Перві фото діскретної відеокарты уд Intel (Intel Arc Alchemist)

Уже дакӯлко рокӯв Intel ріхтувут відео-ядра вшиті в йих сістемы як інтеґрована ґрафіка. Дниськы ачий у первый раз можеме видїти приклад діскретної відеокарты, яку Intel ладят уже пару рокӯв, Intel Arc Alchemist. Маєме пару подобенок уд знамого техно-блоґера Moore’s Law is Dead.

Arc - сяк ся буде называти бренд відео-адаптерӯв уд Intel, котрый ся парує на конкуренцію из днишньыма лідерами торга: NVidia GeForce тай AMD Radeon. Arc Alchemist є первов серійов, котра уже є набізӯвно запланована на выпуск. Intel уже яли ся были "покушати" торг відео-адаптерӯв атого года, презентовали были Intel DG1, но тото была доста слабинька карта, што ся фокусовала на ефектівнӯм хоснованьови енерґії, а не на моци; но майглавноє — она не была приступна простым хосновачам у бовтах. А вже карта, за яку приказуєме дниська, є частинов далекозӯрної стретеґії выд Intel (Intel Xr HPG roadmap), тай представникы Intel ся обіцявут ож резултувуча карта буде мати моци приближно ги Nvidia RTX 3070, буде мати 512 робочых блокӯв ("EU" - execution unit) тай 16 ґіґабайтӯв відео-памняти стандарта GDDR6.

Из нашептаного можеме повісти, ож Intel тоже можут робити над варіантами май дешевої карты "DG2", из верзіями по 448EU, 384EU, 256EU, ци даже 128EU (EU - єднотка робочого блока). Даже тото буде многым бӯлше ги типирь Intel давут в інтеґрованӯй ґрафіци в свойих процесорах.

Жерело: The Verge

Читайте нас на Twitter тай Telegram