Інтерфийсї єден рӯк!

Нись, 23. януара 2022. года, є рӯвно єден рӯк из заложеня главного русинського техноресурса — Інтерфийсы!

На сякый припад хочеме подяковати ушыткым читателям, пӯдписникам, фоловерам, коментаторам — ушыткым тым, тко помагат Інтерфийсї рости у квалітї, розмірови, авдіторії. Днишня публикація буде малинько не таков, як исьте, бізӯвно, привыкли: у сякый сяточный про нас динь мало вам розкажеме за вто, што з Інтерфийсов інтересного ся стало за йсї 365 днӯв.

Авдіторія

За рӯк набрали сьме читаво народу: у Telegram число пӯдписникӯв досягло 109, а у Twitter наша авдіторія вто 53 фоловера. Так си думаєме, ож про натӯлко спеціфічный, узьконапрямленый ресурс ги Інтерфийса, сякі числа сут дуже добрым досягненьом!

Контент

Число опубликованых за сись рӯк вісти досягло 186. Кроме вісти за техніку, технолоґії, компютеры, телефоны, інтернет, кріптовалуты тай ушытко, што ся даяк кыват исих тем, на Інтерфийсї публиковали ся и статї у рубріцї «Популарна наука», котрі майфайно парувут пӯд опис «За мудроє по-простому». Было у нас и інтервю з автором ачий первого у світї штучного інтелекта, бисїдувучого по-русинськы (а конкретно лемкӯвськов бисїдов). Дві вістї были у тестовому режімови озвучені.

Майпопуларныма нашыма статями обставут ся:

• «Бисїдуєме из автором штучного інтелекта, што бисїдує по-лемкӯвськы»
• «Реалістічна реконштрукція Тіраносавра»
• «Ци є таблиця хемічных елементӯв повна?»

Єдным из майглавных вылїпшень стала міґрація Інтерфийсы на нову платформу про публикацію текстӯв — кидь май давно публиковали сьме йих на Telegraph, котрый є продуктом Telegram Team, та нись ушыткі довгі читаня идут у Teletype — из його функціоналностьов публиковати тай шырити статї стало многым май легко, а читателї мавут возмогу читати Інтерфийсу в RSS, філтровати наші Teletype-статї подля катеґорії (йих поку лем дві: «Новостї» тай «Популарна наука») тай класти реакції.

Оформлїня публикацій такой дӯстало піціцькоє вылїпшеня — типирь кажда довга статя, котру публикуєме на Teletype, має свӯй парадный образчик из наголовком а лоґотіпом Інтерфийсы — обысьте нараз могли видїти, за што вам розкаже тота статя.

Редакція

У юнійови 2021. года ид редакції Інтерфийсы припойив ся другый автор! Типирь, кой над контентом трудят ся двоє люди, и частота, и кваліта нашых публикацій пӯдняли ся.

Бонусом!

Сяточно обявляєме тай презентуєме вам наш редізайн. Выдтипирь Інтерфийса буде мати обновлені фірмовый стіль, лоґотіп, оформленя профілӯв тай шріфтову пару.

Читайте нас на Twitter тай Telegram