iPhone 14 Pro тай Pro Max дӯстанут ниґда не сплячый дісплей

Скорше всього фірма Apple дасть свої фурташньо-включені дісплеї у нові iPhone 14 Pro тай Pro Max. Позиравучи на інформацію выд Марка Ґурмана (Bloomberg), «яблычникы» можут указати новый функціонал наєдно из презентаційов iOS 16. Фіча поволит телефонови выдображати на дісплейови дарабчик інформації, закидь дісплей є заблокованый.

Ґурман (прим. ред. исе фамілія, а не облюбленӯсть из їдїньом) розказує, ож шуга не сплячый дісплей ачий буде фунґовати так, ги тото робит типирька на Apple Watch Series 5, а значит ож заблокованый екран буде обновляти образчик май рїдко, што поволит не розтрачовати на сись процес много енерґії. Раз не маєме інформації ци новый iPhone буде хосновати ипен таку технолоґію дісплея (LTPO), гикой у моделах годинок. Но ипен сякый тіп дісплея из низьков потребов електрікы є «падементом» можности держати дісплей фурт уключеным, бо инчак бы читаво скоро садило батерку.

Того року многі аналітикы віщовали, ож iPhone 13 буде мати LTPO дісплей, обы держати функціонл фурт уключеного екрана. Дакотрі девайсы на Android ужек сякоє знавут не первый гӯд. На подакотрых телефонах фірмы Samsung сеся матарґа поволят вам фурт указовати на заблокованому екранови годины, заряд батеркы, віджеты (дрӯбна серсама), тай повно другого.

Ґурман каже, ож чекат ся подобноє типирька выд iOS 16. При тӯм фурт ключеный дісплей не буде лиш єднов новинков у iPhone 14 Pro тай Pro Max, бо подакотрі люди нашептали ож Apple годни дати у них ай новый чіп A16.

Чекат ся ож фірма из Купертіно оголосит щи читаво другых детайлӯв на своюв реґулатнӯв конференції (WWDC), што ся удбуде 6. числа Юнія місяця. Попиля вшыткого, за што ся спомнило у текстови, Ґурман вірит ож на презентації буде інформація ай за подакотрі апдейты на iPad, май конкртено за мултізадачні режімы тай способы робити из дакӯлкома інформаційными оболоками на екранови нараз. Цітує ся репорт выд єдного інженера-розробника Стіва Сміта, котрый найшов інформацію за вто, ож Apple ачий розроблявут можнӯсть слобӯдно міняти розміры оболокӯв на ерканови, гикой можете тото типирька робити на Windows.

Повно шпекуловати туй ниє смысла, бо WWDC буде мало бӯлш як за тыждень, та буде видко што из сього направду буде частьов новых продуктӯв Apple.

Жерело: The Verge

Читайте нас на Twitter, Telegram тай Instagram