Фірму ціфрової безпекы McAfee купили за 14 міліардӯв доларӯв

McAfee, єдні из майзнамых на полю ціфрової безпекы, типирь будут пріватнов фірмов, выкупив йих рокаш інвесторӯв бӯлше ги за 14 міліардӯв америцькых доларӯв. За исе розказали у самӯй фірмі щи в понидїлок, но Bloomberg щи того тыждне писали ож сяка токма ся дуже годна стати.

Фірма McAfee была закладена у рокови 1987 Джоном Мак-Афі (John McAfee), стала майзнама ипен спозад антівірусного софтвара. Сам Джон пӯшов гет из компанії щи в рокови 1994, хоть фірма до дниська силно ся асоціює из ним; а в рокови 2010 фірму McAfee купили Intel за читавых 7.68 міліардӯв америцькых доларӯв. У рокови 2014. Intel выдвергли саму назву McAfee про антівірусный софтвар, тай кличут го выд тогды просто Intel Security.

В октовброви, гӯд-типирь, фірма McAfee вернула ся на стокові торгы. У голошіньови фірмы розказовало ся, ож платформа буде ся дале провадити ги "кібер-безпека начисто", пӯсля продажі "ентерпрайз" дараба свого бізнеса приватнӯв компанії Symphony Technology Grup за 4 міліарды доларӯв у Юлови сього року.

Фірма розказала ож сеся токма, што ся пудписала в понидїлок из Advent International Corp., Permira Advisers, тай rosspoint Capital Partners, буде до кӯнця проваджена у первӯй половци рока 2022.

Сам закладатиль фірмы, Джон Мак-Афі, мав трудный живӯт по тому, як лишив компанію. У рокови 2012. вӯн утїк гет у Ґватемалу, по тому як поліція мала на нього догадкы за забитя його сосїда. У марцьови того року, вӯн штрьомив у махінації из кріптовалутами; поліція указовала ож вӯн, Джон, тай його главный сокотач, на твітерови бизовали свойих фоловерӯв інвестовати гроші в конкретні кріптовалуты, а дале они (Джон тай сокотач) наскоринько продали свої запасы чим цїна скочила идгорі. Сього року у Юнови місяцьови Джона найшли мертвым у камері тюрьмы в Барселонї, такой за пару днӯв по тому як Гішпанія пудтвердила ож екстрадує го домӯв у Штаты, де його уже чекали спозад великых махінацій из даньовыми звітами.

Жерело: The Verge

Читайте нас на Twitter тай Telegram