Meta платит конзултаційнӯв фірмі за діскредітацію TikTok

Материнська компанія Facebook платит єднӯв из майвеликых републіканськых конзултаційных фірм у США за масштабну кампанію діскредітації свого конкурента — кітайської соціалної сїти TikTok, котров володїє пекінська компанія ByteDance.

Суть кампанії є у тому, ож фірма Targeted Victory тручає у великі реґіоналні новинкы письма тай «op-ed»-статї з історіями, котрі указувут на шкоду TikTok про неповнолїтньых хосновачӯв. У сякых історійох майчасто розказує ся за шкодливі «челенджі» (котрі направду выдумувут у Facebook), и сякым способом у борьбу з кітайськов соціалнов сїтьов втягувут ся локалні політикы. Ид сякому выслїдку прийшли у The Washington Post, увидївши уднушнї імейлы.

У фебруаровому письмови діректора фірмы найшли сякі пасажы текста: «[Targeted Victory] треба донести людьом, ож поку козлом удпущеня є Meta, TikTok є истов небезпеков, особено ги загатарна аплікація №1 у пошыреню податкӯв молодых пӯдросткӯв». Из тых иппен імейлӯв знаєме щи, ож єднов из цїли Targeted Victory є удведеня позора уд проблем Meta из пріватнустьов податкӯв тай антімонополных акцій у бӯк компанії: «Бонусом буде, кидь зможеме исе вмістити у май шырокоє голошіня, ож днишнї законопроєкты тай понукы не то, на што ся мусят изфокусувати адвокаты тай члены Конґреса».

Сисї письма давут нам лїпше порозуміти, на які дїйства иде Meta, обы дашто учинити з лідерством свого кітайського конкурента. TikTok не просто єдна из майтирьханых аплікацій у світї — из звіта інсайдеркы Френсіз Гавґен стало розумливо, ож пӯдросткы тратят 2–3 раз май много часу на TikTok ги на Instagram, а популарнӯсть Facebook межи молодыма людьми драстично упала.

Коордінація Targeted Victory щи проходила и через уднушньый Google-документ из назывков «Пӯдлі TikTok-кліпы», наповненый удкликованями на містні новинкы, котрі называли TikTok жерелом небезпечных трендӯв межи пӯдростками.

Примірами роботы Targeted Victory, зо слӯв The Washington Post, мож назвати пошыреня історій за «Devious licks challenge», позад котрого школарї казили авадь крали школноє обладованя. За сись «TikTok-челендж» писали новинкы дакулкох штатӯв, были леґалні дїйства з бока сенатора Річарда Блументала, айбо як узнала Енна Фолі из подкастної сїти Gimlet, зачаток шкодливого «челенджа» быв не у TikTok — ун ся раз шырив у Facebook.

У октовброви Targeted Victory робила над пошыреньом плїтьок за челендж «Slap a Teacher» [дослӯвно «плесни учителя»], айбо, як оказало ся май потӯм, такого у TikTok не было, а плїтькы ся зачали у серії публикацій на Facebook, котрі первым задокументовало выданя Insider. Из сього стає розумливо, ож фірма на бештелованя Meta занимала ся роздуваньом історій не лиш за реалні «челенджі», айбо и за выдумані.

У тот иппен час Targeted Victory активно тручала у телевізію, ґазеты тай радіо позітивні думкы за Facebook: приміром, дякувучи фірмі шырили ся історії за то, як Facebook помагат бізнесам из чорнокожыма властниками.

У матеріалох, котрі промоційовала Targeted Victory, ниґде ся не споминало, ож у йих публикації замішанов є фірма, спонзорована Meta.

Сама Targeted Victory є конзултаційнов фірмов, котра дӯстає читаво много фінанцованя уд Республіканської партії США: за 2020. гуд, приміром, на ниї выдїлили 237 міліонӯв доларӯв.

Жерело: The Washington Post

Читайте нас на Twitter тай Telegram