Microsoft тестувут свою рекламу у файловому менеджерови Windows 11

У єднӯв из майсвіжых тестовых верзій Windows 11 Insider лавреат нагороды Windows Insider MVP 2021 замітив рекламу продуктӯв Microsoft... у «рӯдному» файловому менеджерови операційної сістемы. Реклама ся указала над основнов робочов площов проґрамы, списом файлӯв тай діректорій.

Увидїти рекламу у тестовӯв верзії хосновачови на имня Florian майскорї просто повезло: другым тестерам она ся не указовала, а у офіціалному коментарьови старшый продуктовый менеджер Microsoft Windows Брендон ЛеБланк уповів, ож «исе быв експеріменталный [рекламный] банер, котрый ся не плановало публиковати вонка тай котрый мав быти выключеным».

Мусиме замітити, ож исе далеко не первый раз, кой Microsoft додавут рекламу свойих продуктӯв у сістемні елементы Windows; щи у далекому 2016. годї у файловому менеджерї Windows 10 появив ся быв банер, котрый рекламовав OneDrive — хмарну сокотилню Microsoft.

У 2020 рекламу вебаплікацій Microsoft Office додали у меню текстового редактора WordPad, а у сістемноє гляданя запхали рекламу Microsoft Edge, кой хосновачі глядали там бравзерӯв-конкурентӯв. А єдна из рекламных інціатив компанії у 2021. годї уломила была тестову верзію Windows 11, кой хыба у промо-матеріалї Microsoft Teams буквално лишала хосновачӯв без робочого панела задач.

Жерело: Florian @ Twitter, BleepingComputer

Читайте нас на Twitter тай Telegram