Монітор из непривычнов пропорційов уд LG мож купити за $699

Повно всякого мож было видїти на выставци CES 2022, айбо новый монітор, презентованый фірмов LG, даяк читаво выдїляв ся на позадинї инчого. Мож го купити за $699, што не мало, но менше, як чекали аналітикы.

Закидь другі вендоры чим дале розшырювут свої моніторы, LG DualUp є фактічно просто двома 21.5" QHD моніторами, што йих поклали єден на другый. До вороха мавут по діаґонали 27.6" тай розшыреня 2560 x 2880 пікселюв (пропорція 16:18). Рїшеня не є привычным на типирь, но исе годно стати ипен тым, што треба создательом шелиякого контента.

Монітор DualUp укомплектованый IPS Nano панелами (матрицями) уд LG, з пуддержков технолоґії HDR, тай забират 98% колорової ґамы DCI-P3. Из штандартӯв прикапчованя має два HDMI, єден DisplayPort, пару USB-A 3.0, гнїздо Audio Jack 3.5, тай блок на 90W.

Кроме сього, монітор має два голосникы по 7W каждый. DualUp валовшен, кидь треба, трансловати відео-сіґнал из двох жерел нараз: єден згорі, єден долӯв, што є доста унікатнов фічов.

Пониже можете видїти повну технічну характерістіку:

Жерело: LG

Новинка вызират доста фрішно, а буде інтересно побзерати на реалні сценарії хоснованя, обы розуміти ци світ моніторӯв назад верне ся ид май квадратным формам.

Жерело: The Verge

Читайте нас на Twitter, Telegram, Instagram