Ніл Янґ поставив ултіматум Spotify: авадь вӯн, авадь Джо Роґан — типирь у Spotify не є Ніла Янґа
Канадськый гудак поставив популарному стрімінґовому сервісу ултіматум: «На Spotify годен быти авадь Ніл Янґ, авадь Джо Роґан. Не обадва нараз».
Сякый выбор межи собов тай майвидным подкастером (из котрым Spotify у 2020. годї пӯдписала контракт на $100 млн. за ексклузивні права на стрімінґ Роґанового подкаста) Янґ дав сервісу позад децембрового епізода Joe Rogan’s Experience из інтервю з Робертом Меловном — вірусолоґом, котрого не раз виноватили у пошыреньови дезінформації за COVID-19. Ніл Янґ уповів, ож сяк Spotify «пошырює фейкову інформацію за вакціны, што годно потенціално привести д смертям тых, тко йим повірит» тай запросив удаленя ушыткых свойих пісень из каталоґа стрімінґового сервіса. Гудак такой подяковав лейблу Reprise Records (дочӯрня компанія Warner Brothers) за пӯдпору сякого рїшеня: «Дякуву Warner Brothers за то, што стойите зо мнов тай берете на ся удар — страту 60% дохода из слуханя мої гудьбы у цїлому світї в имня Правды».
У Spotify на йсе удповіли, ож «банувут» позад сякого рїшеня гудака тай надївут ся, ож вӯн скоро ся верне на платформу. Такой представитилї стрімінґового сервіса заявили, ож они хотят, обы «вшыткый авдіоконтент у світї быв приступный хосноватильом Spotify — а з тым приходит груба удповідалнӯсть у балансованьови межи безпеков про слухатилю̄в тай слободов про творцю̄в». Подля слӯв представитилю̄в компанії, у них є «детайлна політика за контент» тай ож из зачатка коронавірусної пандемії они удалили веце ги 20 000 епізодӯв подкастӯв на тему COVID-19.
Исе не первый раз, кой шов Джо Роґана крітикувут за подобноє: май давно на Joe Rogan’s Experience было інтервю из Алексом Джонсом — властником The Alex Jones Show тай InfoWars, забаненым на многых онлайн-платформох вєдно зо свойима проєктами за пошыреня дезінформації за COVID-19 тай промоцію ненависти. Роґан дӯстав читаву порцію неґативных реакцій на тот епізод подкаста — хоть комік и не указовав сімпатії ид Алексу Джонсу вадь його никаньом, публицї ай так ся не полюбило, ож подкаст Joe Rogan’s Experience дав Джонсу слово на YouTube тай Spotify не позеравучи на то, што подкаст самого Алекса Джонса давно забаненый на обыдвох платформох. Пӯсля того епізода ґрупа дохторӯв, ученых тай медичных шпеціаліштӯв пӯдписала удпертый лист ид Spotify, котрый указовав на контроверзійну історію подкаста Джо Роґана у обговореньови COVID-19.
Жерела: The New York Times, BBC
Читайте нас на Twitter тай Telegram
