NFT образчик "знуджена малфа" за $300 000 спозад похыбкы продали за $3 000

Продавач ненарочно написав 0.75 ETH замісто 75 ETH

Ци часто сьте утрачали стӯвкы изрю доларӯв спозад дрӯбної механічної печатної хыбы? Єдному сиґіняшному чилядникови дниська ся стало руно исе. Його NFT образчик "знуджена малфа" (Bored Ape), што мала цїну 300 000 америцькых доларӯв, продала ся лишек за 3 000 спозад недобре покладеної децімалної комы в числови.

Як каже нам CNET, ґазда сього NFT образчика (даякый maxnaut) выклав "малфу" на продаж у сисю нидїлю. Продавач байловав покласти цїну 75 єдениць етеруму (изгруба 300 000 америцькых доларӯв), айбо замылив ся та написав 0.75 етеруму (изгруба 3 000). Айбо кой ґазда похопив яку хыбу учинив — уже ся быв запоздив, бо NFT образчик наскоринько выкупили. Купив "малфу" автоматізованый проґрамный бот, котрый нарочно глядат на такых торговищах товар из чудно низьков цїнов тай купує йих.

Як ся сякоє стало? Коментує maxnaut:

— Та гадаву си просто не быв им доста уважный. Выкладуву на продаж доста читаво усякых товарӯв каждый динь, та видав много такого клынцаня стало ми автоматічным, уже на тото не даву великый позӯр. Направду я запримітив хыбу такой нараз, чим им ї написав, айбо перст рефлекторно клынцнув "пудтвердити", та кой за єдну-дві секунды пробовав им клопнути "выдмінити транзакцію" та было уже пӯздно, "малфу" вже выкупив робот, скильтовано!

На сякі хыбы в анґліцькому културному просторови є окрема назывка: "хыба мастных перстӯв" (анґл. fat-finger errors), ож кой у вас дуже тучні персты, та годни сьте нехотя клопнути не туды, де требало вам. Сякого повно ся стає, главноє из фінанчныма дїлами. Гикой приклад, у рокови 2015. молодый робӯтник банкы Deutsche Bank зхыбив из калкулаціями тай загнав 6 міліонӯв америцькых доларӯв у єден дрӯбный пріватный фонд. Правда разниця туй у тӯм, ож традічный фінанчный сістем має матарґы вреґулованя сякых ситуацій. Кидь зкурта — тоты 6 міліонӯв Deutsche Bank ся вернули такой на другый динь.

А вже минулый ґазда "малфы" не може си вернути свої гроші. Раз тото фунґує лиш сяк у світови NFT транзакцій. Было выроблено 10 000 образчикӯв серії "Bored Apes", каждый из инчакыми унікалными параметрами, гикой барва очи, авадь околарі. Сесе было провбов наподобити аватаркы бавячӯв середины 2000-х рокӯв. На дниська сесе мож раховати "екзклузівным клубом", бо помежи ґаздовӯв сих малф найдеме богатых тай знамых люди, хоть зачаточно образчикы коштовали 0.08 ETH, а значит пиля 320 америцькых доларӯв. Уже дниська, ги видиме, цїны на них скачут поверьх стӯвок тисяч доларӯв.

Жерело: The Verge

Читайте нас на Twitter тай Telegram