Нова ґрафіка Intel Arc A380 доганят GTX 1650 Super уд NVidia у новых бенчмаркох
Подаякі детайлы тай спеціфікації нової ґрафікы уд Intel на персоналні компютеры, май конкретно Arc Alchemist A380 desktop, выклали у сїть у блоґови momomo_us. Кидь віровати блоґерови на твітерови, та новый ґрафічный процесор уд Intel буде мати 128 потоковых процесорӯв (Executable Unit) из частотов роботы онь до 2.45 ґіґагерца. Щи не презентована нигґде відеокарта буде мати 4.6 ґіґабайта відео-памняти, ги понукавут нам у релізови. Но нам май інтересно буде ож што тота карта буде бировати, ци не так? Подле детайлӯв можеме казати ож єї мӯц буде дас така ги у десктопної GeForce GTX 1650 Super, може пораз лїпше, а пораз гӯрше, никавучи на конкретный сценар хоснованя.
Arc A380 буде єднов из двох ґрафічных карт, котрі будут базовані на уже анонсованӯв архітектурі Xe-HPG (DG128EU). Можеме си думати ож будут ай май слабі варіанты из сим самым чіпом, так ги проґнозованый Arc A350, котрый буде мати лем 96 актівных потоковых процесорӯв из 128. У тот самый час майвеликый чіп буде проґнозовано мати аж 512 потоковых процесорӯв. Лоґічно бы подумати ож Intel ладят ай дашто помежи тым, но раз не дуже понятно як они будут конфіґуровані, ци будут там верзії из 256 авадь 384 EU респектівно.
Подаякі спеціфікації будучної карты уже знаєме наисто из опубликованых тестӯв на бенчмаркови SiSoft Sandra. Туй видиме, ож десктопный варіант ґрафікы уд Intel из 128 EU буде мати 1024 FP32 єдноток шадового обрахованя (sharding units). Спомежи другых детайлӯв ипен туй видиме ож карта буде мати 2.45 ґіґагерц частоты, 1 меґабайт кеш-памняти другого шора (L2), тай квоту оперативної відео-памняти на 4.8 ґіґабайта.
Никавучи на сесї резултаты, можеме чекати ож реална сила тої графічної карты буде недалеко уд днишньых GeForce RTX 1650 Super, Radeon RX 580X, авадь даже новтбучної RTX 3050 Ti.
Варуєме вас, обы-сьте ушытко высше не брали ги сяту правду, бо сесе ся спират лишек на резултаты поскоро опубликованых даных уд SiSoft Benchmark. Фірма Intel буде мати пару анонсӯв сього тыждне, на єдному из котрых бізӯвно буде ся булше казати за йих ґрафіку, котра ся напаровує уже довгый час. Будеме чекати!
Жерело: Tom's Hardware
Читайте нас на Twitter тай Telegram
