Будучі обновы Instagram: редаґованя сїткы профіла, хронолоґічный потӯк публикацій

Інжернер Алесандро Палуці (Alessandro Paluzzi) у свому твітерови указав концепт функції, из котров типирька нараблявут у Instagram. Обнова поволит вам міняти містами публикації у вашӯм профілови.

Алесандро выклав у твітерови лишек два образчикы, на єдному из котрых видиме у меню опцію "правити сїтку" (edit grid). Кидь тото клынцнути, та переверже вас на екран редаґованя, де можете вручну совати публикації из міста на місто. Усокотити новый порядок можете кнопков "готово" (done) у верьхнюм углови справа.

Instagram раз щи не давали нияку інформацію за сесю обнову, но гадаєме си ож будеме знати бӯлше нараз чим функція буде ужек май готова ид хоснованьови. Раз знаєме ож лиш зачали ї робити, та щи не дуже ясно коли ї мож чекати наживо про усьых хосновачӯв.

Кроме того, у Instagram прозрадили ся, ож мавут дяку вернути хронолоґічный потӯк публикацій сього року. Сесе онь 6 рокӯв потому, як они таку можнӯсть заказали гет. Раз знаєме лиш ож Instagram тестувут можнӯсть мати переключеня вашого "домашнього еркана" у трьох режімах: "домашньый екран", "выбраноє", тай "пудписаноє". Послїднї два бы мали указовати публикації у хронолоґічному режімови.

Адам Мосері, што розказує нам за сесї обновы у твітерови, каже ож сеся обнова буде приходити живым хосновачам дарабами, значит раз буде даяка тестова ґрупа, тай по тому як оно буде фунґовати у них буде видко коли обнову дӯстанут ушыткі другі. Но бизувут ся ож має ся тото стати до середины сього рока.

Жерело: xda-developers.com

Читайте нас на Twitter тай Telegram