Фірма Oppo буде сама чинити си процесоры на свої флаґманы

Фірма Oppo буде чинити свої личні процесоры на свої флаґманы (смартфоны преміалного класа), рапортує нам ресурс Nikkel. Репрезентанты компанії розказали ож выд зачатку план быв зачати продавати смартфоны из новыми процесорами у рокови 2023 авадь 2024, в залежности выд скорости выробы. Майскоро тото буде технолоґічный процес на 3 нанометра, ліцензійованый выд TSMC.

Кидь ся фірмі Oppo тото подарит, та они станут єднов из майвеликых компаній выробникӯв смартфонӯв из свойим личным набором чіпӯв (SoC). Перич уже Google презентовали свӯй Pixel 6 тай 6 Pro, тоже на йих личному процесорови Tensor. А фірмы Apple тай Samsung уже давно змагавут ся чинити си чіпы, так само ги чинили Huawei щи сперед тым, як йих заказали у США.

Дниськы щи Oppo хоснувут чіпы выд Qualcomm тай MediaTek, руно так ги другі выробникы смартфонӯв у Кітайови, выдколи штрьомили у болото Huawei. Фірма Xiaomi презентовали доста туньый варіант кастомного процесора, Surge 51, щи аж у рокови 2017, котрый ся хосновав у смартфонови Mi 5C, правда из того часу Xiomi не протручали дали нич інтересного, кроме даякых другошоровых чіпӯв на стабілізацію сіґнала камеры тай такоє другоє.

Кроме того треба спомнити, ож фірма Qualcomm зачала пысковати на твітерови у бока Google, спозад йих рїшеня чинити свої процесоры, а значит они скоро тоже можут утратити многых клієнтӯв. На дниська Oppo сут четвертыма у спискови майвеликых выробникӯв смартфонӯв у світови, за статістіков IDC, та вже мавучи налажені путї доставкы, они легко можут понукати свої процесоры такым выробникам смартфонӯв ги Vivo, Realme, OnePlus, тай много другых.

Жерело: The Verge

Читайте нас на Twitter тай Telegram