Нова оператівна памнять DDR5 буде коштовати на 50-60% бӯлше выд DDR4
Ниґда такого не было обы нові технолоґії были дорогыма, а туй изась
Кым май нові технолоґії ниґда не сут домак тунї, тай оператівна памнять компютерӯв є у тому самому кошаркови. Та ясно ож не можеме чекати што нова памнять стандарта DDR5 нараз зачне ефектівно конкуровати из тыма варіантами, што уже сут на торгови. Фірма MSI розказала мало за свої думкы што ся кыват цїн на нові стандарты памняти у свому блоґови.
Перві комплекты памняти DDR5 мож буде куповати наєдно из новов ґенераційов процесорӯв Intel 12. колїна — Alder Lake. Є презентація выд Intel запланована на 4. новема, та люди ся шепчут ож скорше всього там якраз преезнтувут новоє колїно процесорӯв. В тот час пару перепродавачӯв технолоґій уже зачинавут продавати DDR5 наборы, обы мати нашсу дашто наґешефтовати щи сперед презентаційов Intel.
"Історічно ся так изклало ож нова ґенерація оператівної памняти усе є май дорога выд спередущої на 30-40%. Айбо на сись раз, кидь говориме за DDR5, та там сут выхосновані нові компоненты тай технолоґії, што годно пудняти цїну щи высше. Направду чекаєме ож нові моделі будут на 50-60% май дорогыма выд типирїшнього колїна памняти — DDR4. Усе так было, ож треба буде дас два рокы, обы ся выруняли цїны, та обы нова памнять была пропорційно доступна. Из выходом DDR5 чекаєме дашто похожоє" — написав репрезентант MSI у йихньому блоґови
Направду не буде чудно, кидь реална цїна на торгови буде даже піціцько май велика. Популарні вендоры памняти, гикой G.Skill, Galax, тай TeamGroup, уже указали які моделі памняти будут продавати, но щи не указали за які гроші тото буде.
Позиравучи на днишню ситуацію из торгом напӯвпроводникӯв у світови, мож нараз казати ож памнять DDR5 не буде легко найти у бовтах первый час. А кидь найдете, та буде коштовати ги пӯв-хыжі, та мож вірити варованьом выд MSI, а кым май — кидь ся бизуєте брати Alder Lake. Но є туй друга серенча — Alder Lake буде держати ай DDR4, та кидь дуже хочете обновити си компютер, та можете выміняти лиш мат.плату тай процесор, а памнять лишити типирїшню.
Жерело: Tom's Hardware
Читайте нас на Twitter тай Telegram
