Adobe обявили запуск вебверзій Photoshop тай Illustrator у бету

Компанія Adobe опубликовала у свому блоґови пост на тему конференції Adobe Max 2021, у котрому кроме перечисленя новых функцій у єї продуктох замітили сьме інтересный анонс: у бета-тест запустили вебверзії уже леґендарных растрового а векторного редакторӯв Photoshop тай Illustrator. У сьому ипен анонсови такой засвітили ся беты двох новых хмарных продуктӯв Adobe: Creative Cloud Spaces — репозіторію̄в, де команды годни держати вшыткі трїбні йим на роботу файлы тай лінкы, тай Creative Cloud Canvas — таблы про візуалізацію тай брейнштормінґ, по сути аналоґ Miro тай FigJam.

Айбо появленя Photoshop тай Illustrator у вебі не лем упростит роботу ипен из ґрафіков — врокаши з ним у хосноватилю̄в сесих двох проґрам буде возмога давати свою роботу другым на коментованя прямо из вебверзії. Люде, котрым прийде удкликованя на роботу, не мусят мати нич — даже абонемент Adobe Creative Cloud. Они нараз увидят то, што сьте учинили тай будут годни тото обговорити-покрітіковати прямо у бравзерови.

Вебверзія Photoshop из базовыми возмогами редаґованя приступна у публичнӯй бетї: обы удперти в ню̄й даякый Photoshop-файл, заверьгнїт го у бравзер тай тискнїт „Удперти у Photoshop on the Web (beta)“. Веце інформації мож найти у Adobe Help Center.

Illustrator on the Web (beta) межи тым поку приступный лем у пріватному бета-тестови, на котрый мож ся записати за йсим удкликованьом.

Creative Cloud Spaces тай Creative Cloud Canvas такой сут у пріватнӯй бетї, запрос на котру мож учинити си туй.

Жерело: Adobe Blog

Читайте нас на Twitter тай Telegram