Польща тай Болґарія легко проживут без російського газу
Російська фірма Ґазпром на кониць выдрубала подачу ґазу у Польщу тай Болґарію. Сякоє рїшеня было каров за тото, ож респектівні державы не хотїли платити за ґаз у російськых рублях, ги того жадав Ґазпром.
Нагадуєме, ож минуло ужек два місяцї, як Росія перейшла у актівну фазу войны против Украйины, тай паралелно шантажує другі державы.
Шор другых держав Європської Унії тоже одказали, ож не будут платити в російськӯв валутї, айбо раз лишек Болґарію тай Польщу уже выдрубали выд ґазу.
Такой нараз у Польщи удповіли, ож легко проживут ай без російського ґазу, бо мавут читаво запасу у хранилищах, тай потреба на ґаз паде, бо тепліє хвиля. У тот самый час Болґарія обвинила Ґазпром у серйозному порушіньови токмы, тай типирька є у процесови договарьованя из Унійов за варіанты доставкы ґазу из другых міст.
Тото, направду, не буде аж так легко. Болґарія годна потихы выдрїзати ся выд російського ґазу тай нафты, но кидь тото учинити дуже нарїзко, та чилядь ся буде мериґовати. Алтеранатівна доставка ґазу из, най буде, Азербайджану, не буде годна покрыти ушытко.
Ідеалным сценаром про Болґарію было бы вернути ся ид проєктови свої другої ядерної електрарнї (нынї проєкт вылишеный). При тӯм, Польща, наєдно из Нїмеччинов тай другыма державами ЕУ, тай ачий Болґарія из нима, будут убертати голову ид союзови из Новеґійов, державами Середньої Азії тай Сїверної Африкы. Бӯлше того, сеся война, скорше всього, друлит ушыткі державы Унії щи май быстро перейти на жерела выдновльованої енерґії, такі ги сонячна авадь вітрова енерґія.
Ушыткі сесї махінації приведут ид серйозным економічным ударам по російськӯв економіцї. Чом тоды Росія так нагле выдрубала газ ипен сим двом державам?
Мож лиш высунути догадку, ож сякый крок быв нацїленый на вто, обы, спозад економічного удара, взбурити у тых двох респектівных державох уднушньый конфлікт, тай переосмыслити варіанты пуддержкы Украийны у сюй войнї. Годно быти ож Путін просто хоснує сесе як шансу шантажовати державы, тай зобразити НАТО тай ЕУ май пӯдлыми.
Изглядованя указувут, ож бізнесы тай соціум плавно ся адаптувут ид сітуації.
Айно, на єдного бока исе може привести ид енерґетічному крізісови у которкочастнӯв перспективі, но исе буде читавым стімулом про державы перейти на алтернатівні жерела енерґії.
Польща тай Болґарія, мож так казати, выйшли гет из-пуд сферы влива Російської Федерації. Не позиравучи на дочастні проблемы, які спозад того взникнут, сесї дві державы не убстанут ся без помочи свойих сосїдӯв.
Жерело: The Conversation
Читайте нас на Twitter тай Telegram
