У Портуґалії заказали началникам писати робӯтникам у неробочый час

Містні властї серіозно ся узяли за реґулованя условий уддаленої праци.

Новым пакетом законӯв, котрый уже охрестили «правом на покӯй» началникам у Портуґалії заказали писати свойим робӯтникам у неробочый час. Сякоє рїшеня мало бы вылїпшити сітуацію из баланзом роботы а жывота про тых, тко робит «из домӯв».

Удтипирь компанії из веце ги 10 робӯтниками будут платити штрафы за контактованя свого перзонала за гатарами договореных робочых годин. Кроме того, нові законы поволят людьом из дїтьми робити уддалено без потребы выпрошовати поволеня началника — аж доку дїтинї не буде вӯсю̄м годӯв. Такой посеред приятых перемін є жаданя д компанійом реґуларно орґанізовати жыві стрїчи.

Хоть не вшытко, што понукало ся у законопроєктох, одобрили: приміром, «право на удпоєня», котроє мало поволити робӯтникам выпинати вшыткі робочі направы у неробочі годины, не прӯйшло.

Портуґалська мініштерка у звіданьох роботы а соціалной бізӯвности, Ана Мендез Ґодіньйо, на конференції у Лісабонови на прӯйшлӯв недїли уповіла, ож «телеробота годна быти читавов перемінов днишньой сітуації», айбо «єї рӯст треба реґуловати». Она такой подїлила ся надїйов, ож нові реґулації притягнут у крайину чужоземных робӯтникӯв.

«Видиме Портуґалію єдным из майлїпшых міст про тотых ціфровых кочовникӯв а уддаленых робӯтникӯв, хочеме йих притягнути у Портуґалію» — Ана Мендез Ґодіньйо, мініштерка Портуґалії у звіданьох роботы тай соціалной бізӯвности.

Держава уже має візову схему дочасного резідента, учинену про бізнесменӯв тай фріланзерӯв, а портуґалськый острӯв Мадейра має цїлоє село про «ціфровых кочовникӯв» из безплатным wi-fi тай офіснов обладов.

Подаякі другі крайины ги Хорватія а Барбадос увели так звані «візы ціфрового кочовника» нарӯвнї з обычными туріштськыми поволенями.

Жерело: BBC

Читайте нас на Twitter тай Telegram