Reddit дає глядати ай у коментарьох, обы глядати было щи май стӯчно

Дниська Reddit запускат обновленоє гляданя на сайтови, де будут ся індексовати ай коментарї ид публикаційом. У первый раз хосновачам Reddit будут выскаковати у резултатох не лиш самі публикації, но ай шелиякі одказы/коментарї ид ним. Сесе поможе, ги кажут у Reddit, многым хосновачам найти жаданоє поза межов самых публикацій.

У Reddit кажут, ож гӯдтипирїшньоє обзвідованя указало, ож бӯлшина хосновачӯв платформы, котрі голосовали, хотїла бы видїти можнӯть глядати дашто ай у коментарьох. У етапови «обмеженого тестованя» 26 тисяч люди тестовали можнӯсть глядати дашто помежи 5 міліардӯв коментарьох. Выд дниська гляданя по коментарьох доступноє глобално ушыткым хосновачам платформы на компютерах, но щи не у мобілных аплікаційох.

У придачу ид сьому, у Reddit вылїпшат релевантнӯсть гляданя: помежи стандартныма резултатами будете видїти ай вручну выбрані/выписані людьми резултаты. Та, наприклад, кой глядаєте дашто, та кроме резултатӯв, што руно парувут ид вашому написаному текстови, будете видїти ай релевантні "ручні" резултаты.

До типирь, кой дашто сьте глядали на Reddit, резултаты ся шорили по релевантности. Из обновленым гляданьом, резултаты гляданя будут щи уважовати на тото, што ся из публикаційов дїяло на сайтови. Reddit буде ушоровяти резултаты гляданя по тому, накӯлко даякый конкретный резултат гляданя є популарный помежи глядачами. Ваші дїї из резултатом гляданя будут вызначати рейтинг сих резултатӯв про далшых хосновачӯв.

Сись новый метод поволит вам видїти май свіжі публикації, авадь публикації, котрі повно люди глядавут ипен у сись час. Наприклад, кидь глядаєте інформацію за російськый корабель, котрый потопили аддека, та сякі резултаты будут вам выскаковати май идгорі, даже кидь такых публикацій раз не много, лиш спозад того ож много тко сесе типирька глядат.

Жерело: The Verge

Читайте нас на Twitter тай Telegram