Салвадор планує выпустити біткоін-обліґації на ставбу «Біткоін Сіті»
Держава, котра май давно першов у світї учинила біткоін офіціалным платежным способом, типирь планує профінанцовати першый у світї «Біткоін Сіті» через выпуск біткоіновых обліґацій — за йсе на тыждньовӯй подїї про промоцію кріптовалуты у Салвадорови уповів презідент централноамериканської державы Найиб Букеле.
Вӯн заявив, ож кріптовалутный город буде дӯставати ґеотермалну енерґію из вулкана, а удну буде дїяти лем єден налог — на додаточну вартӯсть (VAT). Половка гроший из сього налога пӯйдут на фінанцованя далшых біткоіновых обліґацій, а друга половка — на оплату публичных служб ги збераня смітя; презідент оцїнив інфраштруктуру города у 300,000 біткоінӯв.
«Інвестуйте сюды тай заробляйте як вам ся захоче,» — каже Букеле, — «сисе целком еколоґічный город, котрый робит а живит ся на вулканічнӯй енерґії.»
Планы на «Біткоін Сіті» поку включавут у себе круглу форму города, летище, спалні а комерційні районы тай централну площу, котра з воздуха буде упозировати ги знак біткоіна.
Нагадаєме си, ож у септемброви Салвадор признав біткоін офіціалным платежным способом — тай став у тому першым у світї. Айбо хоть Найиб Букеле и «народный» у свою̄й крайинї презідент, убзвідованя указувут, ож люде не роздїлявут його інтерес ид кріптовалутам.
«Кидь хочете, обы ся біткоін шырив світом, треба заложовати Александрії» — Найиб Букеле, презідент Салвадора.
На подїї была представлена перша обліґація на 10 годӯв, названа «вулканнов». Єї вартӯсть — 1,000,000 американськых доларӯв, а купон буде 6.5%. Зо слӯв Самсона Мова, главного діректора безпекы у провайдера блокчейнової технолоґії Blockstream, пӯсля 5-годового блокованя Салвадор буде продавати часть біткоінӯв, обы дати інвесторам «май высокый купонный процент».
«Сисе учинит Салвадор фінанцовым центрумом світа» — Самсон Мов, CSO блокчейнового провайдера Blockstream.
Што знаєме за біткоінові обліґації на днишньый динь: буде ся хосновати біткоін-сїть Liquid, властї Салвадора уже роблят над законом за безпеку, а перша ліцензія на обмін буде выдана Bitfinex.
«Коли будут выдані 10 обліґацій, $5 міліардӯв у біткоінови будут зняті з торга на дакӯлко годӯв,» — каже Самсон Мов. — «А кидь ище 100 держав узяли бы ся за сякі обліґації, тото была бы уже половка торгової капіталізації біткоіна». Айбо Мов такой заявляє, ож першӯсть даст Салвадорови читаву перевагу: «Кидь через 5 годӯв біткоін сягне $1 млн, они просто продадут го через два квартала тай вернут си уже $500 млн.»
Жерело: Reuters
Читайте нас на Twitter тай Telegram
