Сопутникы фірмы SpaceX чим дале та май часто видко на образчиках из наземных телескопӯв

Фірма SpaceX поклала сперед себе читаву цїль — укрыти планету Земля папланом шіковного доступа у інтернет через космічні сопутникы. За послїднї два рокы стало йих у космосови повно, што уже дниська дає свӯй слїд на резултатах роботы астрономӯв. Статістічно каждый пятый образчик учиненый телескопом буде мати полосы выд сопутника Starlink.

У рокови 2019. SpaceX зачали запускати бӯлше сопутникӯв, та уже дниська на высотї 550 кілометрӯв над земльов можеме видїти бӯлше 1800 космічных апаратӯв. Но тай ясноє дїло ож тым май часто видко йих на образчиках из телескопӯв.

Аналіз такых образчикӯв у Zwicky Transient Facility (ZTF) Палморськой універзіты Каліфорнії наличили 5031 ґанджӯв, што лишили сопутникы Starlink у період из 2019 до 2021 рока. Палморська обзерваторія чинит обникованя нӯчного неба кажді два дны, тай має важну функцію — позераня за нагодными астероїдами тай другыма небесныма обєктами, які потенціално годни ся сунути у бока ид Земли.

"У рокови 2019 лишек 0.5% образчикӯв мали слїды супутникӯв, а дниська тото вже скоро 20%."
- Przemek Mróz, лідер изглядованя

Не никавучи на тото, як читаво вырӯс процент пошкодженых образчикӯв, шпеціалішты из обсерваторії кажут ож сесе не ож дуже має влив на ефективнӯсть йихньой роботы.

"Є піціцькый шанс ож пропустиме даякый астероїд, авадь подаяку подію в космосови спозад тої полоскы выд сателіта. Айбо кидь руняти из тым ож домак нич не видиме каждый раз кой ся захмарит, та зачинаш розуміти ож тоты сопутникы тото нич."
— Том Прінц, соавтор изглядованя

SpaceX планувут вывести на обріту Земли поверьх 10 изирюв сопутникӯв до рока 2027. Можеме уповісти навпереда ож тоды скоро каждый образчик из телескопа буде мати полосы выд сателіта Starlink. На другого бока учена чилядь каже ож в тот час уже мож буде рїшити тоту проблему софтварово, мавучи проґрамный код, котрый буде помагати убходити тоты ґанджі, авадь навпереда прораховати путь сопутника тай знимковати тот дараб неба у другый раз.

"Мусиме указати ож сесе має ефект лишек на знимкованя кой ся змирькат. Знимкованя домак уночи не мало бы мати такый ефект выд сопутникӯв Starlink. Проблема из знимкованьом гет уночи може взникнути уже тоды, кидь другі компанії зведут повно сателітӯв на высші орбіты."
— Przemek Mróz

Жерело: newatlas

Читайте нас на Twitter тай Telegram