Што знаєме за рекламну платформу в Telegram на днишньый динь

Павел Дуров, заложитель месенджера, прокоментовав недавньый анонс рекламної платформы, котра має цїльов дати Telegram возмогу дале быти безплатным тай неограниченым. Вӯн дав позӯр на сякі пункты:

1. Реклама у Telegram не буде ся появляти у списови четӯв, личных четох ци ґрупох. Єї вы увидите лем у грубых каналох [котрі мавут веце ги 1000 читателю̄в — прим. InterФийсы] — у них уже и так є реклама, а пӯдпора ипен такых каналӯв зо слӯв Дурова є май розтратнов про Telegram.
2. На указованя рекламы не будут ся брати личні дані хосноватилю̄в — она буде тарґетовати ся лем на тематику каналӯв, йих языкы вадь просто на конкретні каналы.
3. Офіціалні рекламні уповісткы будут ненаязливыми. У них буде лем куртый текст [до 160 знакӯв — прим. InterФийсы] без вонкашньых удкликовань ци медіаконтента. Сякі уповісткы будут ся появляти лем пӯсля того, як прочитаєте вшыткі другі уповісткы у каналови.

Коли рекламна платформа выйде из тестового режіма, а у Telegram буде доста гроши, обы покрыти свої розтраты, гроші з рекламы буде дуставати не лем сам Telegram; уведут ся ще доходы про авторӯв, на чийих каналох рекламні уповісткы ся указувут.

Кроме того маєме ще інформацію за варункы, на котрых фунґує рекламна платформа Telegram: майінтересным детайлом видиме то, што майскорї команда месенджера розраховує робити напряму из грубыми купцями. Процедура покупкы рекламы на платформі предвижає мінімалну суму €2,000,000 (два міліона евро), з котрої €1,000,000 Telegram буде держати ги депозіт, а осталноє иде на розтраты купця на рекламу. Депозітна сума вертає ся ид вам у тому припадї, кой розӯрвете контракт, айбо потратите веце ги €10,000,000 на рекламу за послїдньый гӯд.

Сяка сістема годна быти розрахована як на філтрацію уд ушелиякого низкоквалітного контента, так и на роботу через посередникӯв, де ткось бде вносити депозіт тай продавати малым клієнтам возмогу рекламовати ся.

Рекламні уповісткы будут проходити модерацію подля „Правил рекламної платформы“ тай „Правил а рекомендацій ид рекламі“.

Жерело: Павел Дуров @ Telegram

Читайте нас на Twitter тай Telegram