У Twitter ладят ся запустити функцію довгых публикацій

TechCrunch написали, ож у ближчі тыжднї фірма Twitter ладит ся опубликовати функцію Twitter Notes.

За сякоє было чути ай май давно, уже пару місяцюв люди шпекуловали ож у Twitter ладят ся ид запускови подобной функції. У Майови місяцьови изглядователька Джейн Манчун Уонґ шырила образчикы, де функція была названа то Twitter Notes, то Twitter Articles, што поволят хосновачам ріхтовати такой комплектні публикації из читавов грудов текста, из образчиками, удкликованями, тай так дале. Щи май бӯлше образчикӯв пошырила у Апрільови изглядователька Німа Оуї, де было видко ож хосновачі можут учинити тоту публикацію доступнов свойим слїдователям, авадь ушорити ї доступнов через удкликованя тай розметати дале по вебови.

Кидь віровати изглядователям из TechCrunch, та нова матарґа раз ся буде кликати Notes, тай ачий буде доступна широкому исписови хосновачӯв аплікації.

Сяка читава зміна годна силно змінити цїлу сїть, бо ипен обмеженя у 140, а пак — 280 из рока 2017, симболӯв на єдну публикацію, было головнов особностьов Twitter. Айбо на другого бока, люди ай так уже пишут дуже великі публикації на платформі, просто изкапчувут йих у май довгі ланцы (threads), авадь просто капчавучи скріншоты из свойим текстом, котрый ся не став у основный твіт.

Новый функціонал може вызирати ги просто провба исе ушытко упорядковати. Буде видко, як тото допадне.

Жерело: The Verge

Читайте нас на Twitter, Telegram тай Instagram