Twitter пущат "неґатівні реакції" ушыткым хосновачам

Выд недавна подакотрі из хосновачів твітера могли запримітити новый функціонал — можете класти "дізлайк" на твіты. Исе нова експеріментална функція выд Twitter, за яку ся гласило щи того року, тай до недавна была приступна лишек малому числови хосновачӯв, выд типирь буде ґлобалнов.

На зачатку таку опцію видїли лиш выбрані хосновачі у веб-верзії, но типирька у Twitter кажут ож хочут розонадїти функцію ай на iOS тай Android аплікації. Сяку кнопочку про неґатівну реакцію, ги на образчикови высше, можете видїти на Reddit публично, айбо на твітерови она не буде видима ушыткым, ай лиш вам самым. Twitter буде хосновати зобрану статістіку обы выборочно указовати даякі выдповідї ид твітам.

У Twitter кажут ож резултаты експерімента указувут нам ож хосновачі кладут "дізлайк" майбӯлш на коментарї, котрі йим сут уразливі, авадь не інтересні. Статістіка указує ож ипен сив кнопков выбрані хосновачі майчасто позначовали такый контент, котрый бӯлш не хочут видїти, замісто другых, май давно екзістувучых, інструментӯв на Twitter. До того могли сьте іґноровати даякого хосновача, авадь потӯк твітӯв.

Сама фірма є бизӯвна, ож додавучи можнӯсть класти "дізлайк" они досягнут лїпшого про хосновачӯв платформы Twitter, тай кажут ож сись функціонал може ся убстати из нима навхтема.

Можнӯсть класти "лайк"/"дізлайк" є ачий майпростым способом зобрати даяку статістіку, даяку выдповідь выд свої авдиторії, но туй тоже не без потенційных проблем. Дізлайкы, ги такі, подаколи ся хосновали у запланованых атаках на люди. Значит така матарґа у твітерови може дати можнӯть "заткати" думкы тых люди, из котрыма вы просто не согласні.

Не так давно YouTube изпрятали покажчик дізлайкӯв на свому сервісови, указувучи го лишек авторови контента. В тот самый час фірма Facebook тоже експеріментовала из неґатівными реакціями, но ниґда не імплементовала йих на май широку авдиторію.

Жерело: The Verge

Читайте нас на Twitter тай Telegram