Twitter робит над функційов редаґованя твітӯв

Люде доста давно просят додати у популарну мікроблоґову соціалну сїть можнӯсть редаґовати уже опубликовані твіты. Натӯлко давно тай інтензивно, ож тото стало мемом.

Айбо чого Twitter щи не має тої функції, кидь хосновачі так тото просят, а вшыткі другі знамі соціалні сїти давно реалізовали ї у себе? Причина не у технічных ограниченьох ци чажкости исповненя: просто прӯйшлый CEO Twitter, Джек Дорсі, мав свою візію соціалної сїти, у котрӯв можности постфактум міняти вміст публикацій міста не было — свою думку вӯн пӯдкрїпляв тым, ож такый функціонал мож легко злохосновати, обы міняти смысел уповісток уже пӯсля того, як они станут популарными.

Годно быти, ож планы на «ґомбу редаґованя» так ся читаво поміняли спозад того, ож роль CEO компанії перейшла ид Параґу Аґравалу.

1 апрїля у офіціалному профілови Twitter появив ся анонс редаґованя твітӯв, айбо хосновачі бізӯвно подумали, ож тото лем фіґля.

Через пару днӯв пӯслв того появила ся інформація, ож активный хосновач Twitter Ілон Маск купив 9.2% акцій компанії тай став майзначным єї акціонером, а у свойому акаунтови у єдноименнӯв соціалнӯв сїти опубликовав обзвідованя, сформулованоє як: «Ци хочете [увидїти у Twitter] ґомбу на редаґованя?». 74% зазвіданых проголосовали за «анйо». Маск у коментарьови уточнив, ож исе важноє обзвідованя, а май потӯм Параґ Аґравал продубловав тот иппен коментарь Ілона Маска.

Типирькы в офіціалнӯв сторӯнцї Twitter мож увидїти обясненя, ож функція редаґованя была у розробцї щи з того рока, тай уточненя, ож «ідея не была узята их обзвідованя». Тестованя начне ся межи хосновачами тестової проґрамы Twitter Blue Labs, котра є частьов платного абонемента Twitter Blue.

Представитилї компанії успокоювут публику: за часові ограниченя тай прозорӯсть внесеных правок не забыли, «защита цїлостности публичного бисїдованя — пріорітет №1» про Twitter у сьому дїлови.

Жерело: The Verge

Читайте нас у Twitter тай Telegram