Twitter заказує публиковати фотькы а відеа «пріватных особ» без йих поволеня
У сякых сітуаційох у позӯр будут ся брати контекст, «новиннӯсть» тай другі факторы.
Twitter поволит хоснователям писати запросы на удаленя фотоґрафій а відий себе, знятых без йих поволеня — сякым адмініштрація соціалної сїти розшырила свӯй уже єствуючый заказ на пошыреня пріватної інформації, додавши пункт за медіа. Айбо сесе правило не буде дїяти на публикації, «котрыми ся подїлили у публичнӯм інтересї вадь котрі додавут вартости д публичному діскурсу».
Принимати ся будут скаргы уд субєктӯв тотых «пріватных медий» авадь их представителю̄в.
«Публикація перзоналных медий, такых ги фотькы а відеа, годна потенціално нарушити конфіденціалнӯсть індівіда тай привести д емоціоналнӯв авадь фізичнӯв шкодї», — пише ся у публикації Twitter Safety Blog. «Злохоснованя пріватными медіами годно зацїпити хотького, айбо може мати непропорціоналный ефект на жон, актівіштӯв, діссідентӯв тай членӯв мінорітарных сообществ.»
Хоть правило и дїє на ушыткі «медіа, знятых без соглашеня зображованых», описані сут такой и припады, у котрых Twitter не буде удаляти тоты медіа. Приміром, у сітуації з публичными особами — сися катеґорія обычно уключат політикӯв, знаменитости, тай другых добрї знамых люди. Кроме того, адмініштрація буде никати на контекст тай другі правила ги сексуалный контент по присилованю. Ще не будут удаляти ся публикації, у котрых подїленя «пріватными медіами» є про помӯч зображованым особам у крізіснӯв сітуації, має высокый «публичный інтерес» и позад того є вартым вісти; посты, обществена цїннӯсть котрых є май высока ги різікы про особу тай медіа, освічені у ЗМІ такой будут ся убставати на платформі.
Речник Twitter Трентон Кенеді уповів, ож модераторы будут читаво аналізовати обстояня публикації пріватних медий тай контекст. Кенеді такой уточнив: нова політика компанії жадат запросӯв «уд першого лиця», а не просто общої скаргы.
– Навгул наша політика за пріватну інформацію сяка: кидь она є легко приступнов за гатарами Twitter, мы нич из нив не будеме чинити у Twitter. – речник Twitter Трентон Кенеді.
Читайте нас на Twitter тай Telegram
