У Instagram скоро появлят ся абонементы про творцю̄в

На йсе указує спис уднушньых покупок у аплікації Instagram у App Store.

Май давно у сьому годї команда Instagram заявила, ож хоче изглянути ідею абонементӯв про творцю̄в; пак у розробцї была замічена функція „ексклузивных сторіс“, котрі могли увидїти лем платні абоненты автора.

Упозирує так, ож типирь соціална сїть планує запустити сесе у май шырокый приступ: недавно Instagram убновив сторӯнку свої iOS-аплікації у App Store тай додав на ниї інформацію за уднушнї покупкы, названі „Instagram Subscriptions“.

До сього у списови были лем Instagram Badges — способ фінанцово пӯдперти свойих ублюбленых творцю̄в на прямых транзлаційох йим. Типирь ид ним ся придали позіції Instagram Subscriptions, цїновый діапазон котрых поку ся держит у гатарох пяти американськых доларӯв. Видиме дві опції: єдну на $0.99 тай другу на $4.99.

Обычайно Instagram проводит тесты новых функцій межи малов ґрупов творцю̄в сперед тым, як учинити йих май нашыроко приступными. Исе значит, ож кидь абонементы скоро ся появлят про американськых хосноватилю̄в, не факт, ож приступ ид ним нараз ся появит у вашого ублюбленого автора.

Подля даных зливатиля Алесандра Палуці (котрый у лїтї 2021. года найшов функцію „ексклузивных сторіс“ кой она ще была у розробцї) из сторіс, опубликованых ги ексклузивні не мож чинити знимкы екрана, айбо автор годен йих усокотити у фасціклу з „убраным“, котру пӯдписникы увидят, кой куплят си абонемент на автора. Палуці такой убявив, ож абоненты будут дӯставати шпеціалні значкы тай приступ ид ексклузивным прямым транзлаціям — сесе вӯн узнав из уднушньых розробок, найденых у аплікації Instagram.

Хоть детайлӯв за абонементы уд команды Instagram поку не є, глава соціалної сїти Адам Мосері на Creator Week у юнови-місяцї уповів, ож платформа робит над трьома способами монетізації про авторӯв: комерція — брендованый контент, мерчендайз, партнерські проґрамы; дїленя доходӯв из рекламы з творцями; прямі платежі тай платный контент вадь абонементы.

Instagram не єдиный у свою̄й гонитьбі. Приміром, у септемброви у ограниченый приступ функцію „супер-фоловерӯв“ запустив Twitter.

Жерело: TechCrunch

Читайте нас на Twitter тай Telegram