TikTok тестує нову опцію, поєдны хосновачі уже ї запримітили

Подакотрі люди запримітили «чистый режім» проникованя у себе в аплікації, што поволят йим никати контент без налїпленых звирьхы елементӯв інтерфейса, гикой ґомба коментарюв, опис до відеа, тай такоє. TechCrunch кажут, ож фірма TikTok пудтвердила йим ож исе новый функціонал, котрый ся ипен типирь тестує, но раз тяжко уповісти кӯлко люди мавут доступ до новинкы.

Тоты, у кого доступ до новинкы є, можут си уключити «чистый режім», кидь придержат перстом відео, тай выберут «чистый режім» у оболокови, што выскочит. Ипен так го мож выключити, авадь клынцнути на ґомбу у нижньому правому углови екрана.

Раз тото фунґує так, ож при актівації режіма, вы можете проникати відео без ушыткых елементӯв, што можут перекрывати даякый контент на відео. Айбо при тӯм, кидь перелистните на далшоє відео, та оно зась буде у «мовчаному» режімови из ушыткыма сістемныма ґомбами, што перекрывавут відео. Раз не ясно ци оно буде фунґовати сяк, авадь ци буде преферованый режім держати ся ай дале, закидь ся не переключите на дашто другоє, што бы вызирало доста лоґічным.

Из другого інтересного, было запримічено ож «чистый режім» мож уключити усягды: проникувучи секцію рекомендацій, пудписок, тай даже у відеах, загнаных через пріватні оповісткы. У тот самый час, сякый режім не дає ся уключити, кидь записуєте екран. Исе доста лоґічно, бо, теоретічно, исе поволит усокотити унікалный контент творцюв платформы, обы го не мож было легко «украсти» через режім без накладеных елементӯв.

Редакція не має дякы даяк перехвалити сяку новинку, айбо направду многі хосновачі проґрамы казали ож читаво йих мерфелит тот факт, ож елементы на екранови перекрывавут повно контента из відео.

Тот факт, ож фірма TikTok придає сяку функцію, може быти знаком ай того, ож платформа буде ай дале сунути ся у бока май довгых відей. Не так давно фірма розшырила лімітацію на довжину відео из єдної минуты, аж до дисять. Елементы, што закрывавут дараб відеа, ачий не читаво рїжут око, кой позирати 30-секундні мемы, айбо никавучи відео на 10 минут, тото може вже мало мериґовати.

Жерело: The Verge

Читайте нас на Twitter, Telegram тай Instagram