Уд смартфона до «тиґлы»
Робін Уест — 17-рӯчна дївочка из Брітанії каже, ож не має смартфона.
Замісто того обы сидїти у аплікаційох, гикой TikTok авадь Instagram, она каже ож доста їв у жебови тої «гычкы».
Гычков туй кличеме направу, котра домак не «смарт». Простинькый телефон, котрый не може ай крыхты из того што валовшен iPhone. Из такого девайса можете дакому позвонити, написати оповістку (SMS), тай часто на сюм є кониць. Подакотры похожі моделі щи будут годни крутити радіо, авадь фотькати, но бизӯвно без інтернета тай аплікацій.
Сякі «гычкы» функціонално сут похожыми на тоты телефоны, што сьме си йих куповали у кӯнци 90-х, на зачаткови 2000-х рокох.
Робін Уест, панїка, за котру сьме споминали высше, дорадила ся удказати ся уд смартфона два годы типирь, тай было тото доста ненароком. Каже, ож кой «гавкнув» єї тодышньый, та глядавучи заміну, запримітила на полици у маґазинови из хоснованов електроніков тоту «тиґлу» за смішні гроші.
Типирїшньый телефон Робін, французької фірмы MobiWire, кощовав їв 11 америцькых доларӯв. Но тай, спозад того ож сесе не смартфон тай не має доступа до інтернета, она не тратит ся каждый місяць на дорогі «меґабайты».
«Закидь не купила-м си сесю тиґлу, та ани не замічала-м ож як смартфон выкривляв ми каждый динь. У мене было преповно «соціалок» на переписованя, но попри тото не устигала-м пошорити свої роботи, бо нич, до сидїла-м у телефонови.» — каже Робін
Молода жителька Лондона каже, ож ачий бӯлше не купит си ниякый дуже розумный телефон, доста їв тиґлофона.
«Довольна-м свойим типирїшньым телефоном, не думаву ож вӯн ня даяк обмежує. Я бизӯвно стала май актівна.»
Тиґлофоны ставут май популарными за послїднї рокы. Гляданя простых телефонӯв у ґуґлови выросли на 89% помежи роками 2018 тай 2021, согласно из звітованьом фірмы SEMrush.
Щи єден інтересный звіт розказує нам ож ґлобалноє число проданый тиґлофонӯв выросло из 400 міліонӯв у 2019 рокови скоро до міліарда у рокови 2021.
В тот самый час єдно изглядованя уд фірмы Deloitte каже нам ож каждый десятый хосновач телефона у Зєдненому Королівствови не має смартфона, ай ипен сяку «гычку».
«Типирька навертат ся даяка носталґія, мода ся сяка зачала, котра тягне за собов ай удроджіня тиґлофонӯв» — каже Ернест Доку, експерт по мобілным направам сайта unswitch.com
«Многі из нас мали ипен сяку гычку ги наш майпервый телефон, та ясноє дїло ож у нас є даяка носталґія, лудно нам за тым часом, тай за атрибутами того часу, помежи якыми є ай простинькый телефон»
Ернест Доку каже дале ож ипен перевыпуск телефона Nokia 3310 у рокови 2017 быв єдным из факторӯв нового пробуджіня інтереса ид гычкофонам. Фірма Nokia тручала його як добру алтернативу предорогым смартфонам, котрі, спозад свої цїны, перестали быти дачим доступным.
Ясноє дїло ож сесе не заміна, нитко не чекат выд такої тиґлы функціонала уровня флаґманӯв iPhone тай Samsung. Но гычкофон дає вам гет другі доброты — сесе мӯцна направа, котра выдержит до тыждня без заряжаня.
Пжемек Олейнчак, психолоґ, пять годӯв назад поміняв свӯй смартфон на Nokia 3310, главноє якраз спозад часу живота батеркы. Лиш потӯм вӯн порозумів ож сяка направа дає му ай бӯлше доброт.
«Сперед тым фурт им сидїв у телефонови, читав усячино, што ми ачий не мусай было знати ипен у тот момент. Типирь маву мало бӯлше часу на себе тай на свою родину. Великым бонусом ипен минї є тото ож не мушу типирь „лайкати“ усячино на фейсбукови, тай не розказуву за себе тӯлко пріватної інформації незнамым людьом.» — каже Пжемек.
В тот самый час, пан Олейнчак, котрый жиє в Польщи, признав ся ож сякый «переход» не быв легкым такой нараз.
«Сперед сим фурт им позирав маршруты автобусӯв, авадь де є наблизь ресторан кой сьме путьовали даґде. Типирь я сяк не можу, та мушу тото ушытко поузнавати тай заплановати щи сперед путьованьом. Но на сесе ся наскоринько навыкло.»
Єден из выробникӯв сякых тиґлофонӯв из Нью-Йорка, фірма Light Phone, узяла мало май модерный приступ ид вырїшеньови проблемы. Они чинят продукт, телефон, котрый, кроме стандартного звонїня тай писаня, дасть вам возмогу ай слухати подкасты, прикапчовати наушникы через bluetooth, тай щи пару інтересных добриньок. При тӯм у фірмі кажут, ож они ся зарекли мати в телефонови соціалні сїтї, новинкы, електронну пощу, інтернет-бравзеры, авадь другі інструменты, што можут привнести суйиту у ваш живӯт.
У фірмі кажут ож фінансовым назором рӯк 2021 быв майчитавым, принїс йим на 150% бӯлше гроши як гӯд 2020. Исе вшытко рахувучи ож Light Phone не є дешевым — цїна ся зачинат из 99 америцькых доларӯв.
Єден из закладатилюв Light Phone, Вайвей Танґ, каже ож на зачаткови плановало ся мати сяку направу обы хосновати гикой «другый телефон», закидь, наприклад, чекаєте свӯй телефон из ремонта, авадь ваша основна направа просто розрядила ся. Но уже днись, так видиме, ож бӯлше половины покупцюв хоснувут го гикой свӯй основный телефон.
«Кобы інопланетяне прийшли типирька на Землю, та гадали бы си ож смартфоны — тото домінантна інтеліґентна раса на сюй планетї, што контролує люди. Тай направду сяка котрола буде ся лиш усильовати из часом. Подакотры люди зачинавут розуміти ож туй дашто не добрі, ипен такым людьом мы можеме дати алтернативу» — каже Вайвей
Професор Сандра Уачтер, спеціалішта у штучному інтелектови універсітета Оксфорд, каже, ож сесе доста чекано, ож повно люди зачало глядати алтернативы, май простинькі телефоны.
«Гадаву си, не треба розказовати ож функція звонїня уже давно не є овсновнов у смартфонови, подакотры люди домак не звонят. Ваш смартфон дниська — бавка, вы там читаєте новинкы, навіґуєте у вароши, пишете нотаткы, хоснуєте го даже ги буділарош» — каже Сандра
Смартфон фурт вам чинит суйиту, бо удрыват вас уд реалности навхтемашньыми оповістками, «важными» новинками, не дає вам ай минутку перепочити. Мозоґ чилядника не быв щи до такого прилаженый.
«Сесе абсолутно дало ся чекати ож много люди зачали крятати у бока май ид простым телефоном. Тот тиґлофон дає йим мало бӯлше часу обы ся концентровати на каждоденному. Сесе успокоює люди. Изглядованя кажут нам ож коли у чилядника є помного варіантӯв на выбор, ото стресує.» — каже дале професор Уачтер.
Наша знама из Лондона, Робін Уест, каже ож повно люди сут домак шоковані єї выбором телефона. Каже «ушыткі думавут ож сесе лиш епізодична річ, звідавут ся коли си вже куплю смартфон, сього тыждне ци на другый аж».
Жерело: BBC News
Читайте нас на Twitter тай Telegram
