Віденські музеї учинили си OnlyFans, обы указовати модерноє умілство
Турістичный департамент престолного австрійського вароша кыває ся против цензуры умілства у соціалных сїтьох
Веце ги через стороча пӯсля того, як умілцї Віденської Сецесії обявили „каждому віку своє умілство; умілствови свою слободу“, главный австрійськый варош найшов новоє місто, котроє не цензурує умілськоє выявленя: платформу про доростлых OnlyFans.
Віденськый департамент турізма зареєстровав си профіл на популарнӯв платформі OnlyFans, де не просто ни є цензуры на голі тїла, а она є онь за йсе и знамов, ож поволяє сякоє слобӯдно публиковати. Исе протест против наложеня цензуры на його музеї а ґалерії на другых платформох.
У юлови, Музей Албертіны дӯстав блокіровку свойого профіла у TikTok пӯсля того як опубликовав там роботу японського фотоґрафа Нобуйоші Аракі. Тота робота убсяговала жӯнські перса, спозад котрых соцсїть и заблокіровала профіл. У 2019. годї быв похожый інцідент; тоды Instagram выню̄с вердікт: картина Петера Паула Рӯбенса нарушає правила, бо даже тоты образчикы, котрі убсягувут наготу лем у „артістичный ци креативный способ“, заказані сут. У 2018. годї фотоґрафія 25-тысячолїтньої фіґуркы „Венеры з Вілендорфа“, опубликована на сторӯнцї Natural History Museum у Facebook, была признана адмініштраційов соцсїти ги порноґрафічна — тай удалена гет из платформы.
Віденськый Leopold Museum такой ся стыкав из проблемов цензуры умілства: у 2018. годї рекламні реґулаторы Нїмечины, США тай Споєного Корольства забраковали городську турістичну кампанію музея из постерами, котрі убсяговали картины експресіонішты Еґона Шіле. Кампанія такы пӯшла у люди — айбо про то музей прикрыв тїла на рекламных матеріалах написом „Прӯйшло 100 годӯв, а сисе ай так надміру сміло“.
У сьому годї Facebook а Instagram не пропустили куртоє відео, вінованоє 20. рочницї Leopold Museum, у котрому была картина Коломана Мозера „Liebespaar“ — соцсїти назвали го „потенціално порноґрафічным“.
Типирь сякі вытворы умілства у ціфровому видї будут приступні на сторӯнцї Відня у OnlyFans.
Гелена Гартлауер, речниця турістичного департамента города, уповіла, ож културным інштітуціям главного австрійського вароша є „майже нивозможно“ хосновати картины из оголеными фіґурами у промоційных матеріалох.
„Бізӯвно мож робити без того, айбо сисї картины сут крітічні тай важні про Відень — узьмім автопортрет Шіле 1910. года, тото єдна из майкултовых його вытворӯв. Кидь они ни годни быти хосновані у такому читавому комунікаційному інштрументови ги соцсїти, тото ничестно тай фрустраційно. Зато сьме подумали [за OnlyFans — прим. The Guardian]: накониць, даякый способ указати сисї речи.“
Перві пӯдписникы „18+ контента Відня“ на OnlyFans дӯстанут вадь Віденську городську картю, вадь білет, обы вживу увидїти выставлені у музейови роботы.
Город наново зачинат тручати себе ги турістичноє місто пӯсля того як австрійська власть полївила ограниченя на вїзд у крайину. Притӯк турістӯв у 2020. годї упав на 78.4% порӯвняно из 2019., а у подакотрі місяцї навщивитилю̄в домак ни было.
Айбо Гартлауер заявила: кампанія „Відень роздїває ся на OnlyFans“ не лем про то учинена, обы приманити туріштӯв; она такой призвана пӯдняти уровинь зналости цензурных штандардӯв, у гатарох котрых мусят робити модерні умілцї.
Instagram, таги його родичӯвська компанія Facebook, узяв си строгу політику против наготы пӯсля многорӯчной габы крітікы, даже ни никавучи на то, што платформа стала основнов про умілцю̄в. У юлови люде креативных професій протестовали против ничестної промоції йих робӯт у сїти хоснувучи теґ #FixTheAlgorithm.
„Рӯвнявучи з тыма художниками, котрі пӯдпадавут пӯд сисю цензуру, щи сьме серенчливі,“ — каже Гартлауер, — „хочеме лем зазвідати: а ци треба нам сякі ограниченя? Тко рїшає што зацензуровати? Instagram цензурує образчикы, айбо подаколи даже не будете знаєте за вто — исе барз нипрозрачно.“
OnlyFans быв заложеный у 2016. годї, желавучи стати май слобӯднов а честнов платформов про онлайн-творцю̄в рӯзных масти, хоть за час пандемії сервіс став сінонімом секс-праци. У прӯйшлому годї сайт ся пӯдняв из 7.5 міліонӯв хосноватилю̄в ид 85 міліонам, платячи веце ги 2 міліарда доларӯв абонементных гроши 1 міліону творцю̄в.
В авґустови OnlyFans заявив, ож розорве зязкы из „одкровеным“ контентом позад грозьб уд платежных сістем, айбо компанія скоро ся розвернула пӯсля реакції сообщества, уповівши, ож из платежками она ся догварила — хоть на тот момент інцідент уже став про многых хосноватилю̄в напоминаньом того, накӯлко они зависимі уд платформ.
Іронічно, ож Віденськый департамент турізма натрафив на проблемы з промоційов нововчиненого OnlyFans-акаунта. Twitter, Facebook, Instagram — ушыткі они не пропустили удкликованя на платформу.
Гартлауер уповіла, ож комплікації из запуском кампанії лем доказали, ож соціалні сїти мавут неограничену власть, кой глушат артістичні выявленя. „Сисе нам май назад указує, ож исе ипен тота звіданка, котру треба звідати.“
Она спозоровала: департамент турізма продовжит хосновати свӯй OnlyFans-профіл за границями сьої кампанії, айбо речниця щи ни знає як часто тай чим вӯн ся буде поповньовати.
„Сися наша маркетінґова ініціатива ни є ултімативным рїшеньом проблематичных взайимин світӯв умілства тай соцсїти, айбо [...] хочеме уповісти за ся, за наші цїнности а вірованя,“ — каже Гартлауер. — „Відень усе быв знамый за свою удпертӯсть.“
Жерело: The Guardian
Читайте нас на Twitter тай Telegram
