VPS тай Campfire — два нові AR-проєкты Niantic

Компанія Niantic знама за свої бавкы у доповненӯв реалности: Ingress, Pokémon GO, Harry Potter Wizards Unite. Ушыткі йсї три бавкы мавут дашто ворошноє, кроме того, ож они были выпущені з пӯдпоров удповідно такых «ґіґантӯв» ги Google, Nintendo тай Warner Bros. — основов ґеймплея сут навіґація по реалному світови тай віртуалні взаємодїйства из реалными обєктами.

В ушыткых трьох бавкох ваш аватар кыває ся вєдно з вами: на йсе ся хоснувут GPS-сіґнал тай картоґрафічні податкы из Google Maps тай OpenStreetView.

Приміром, у Ingress основнов механіков є захопленя «порталӯв», котрі ся розміщувут там, де у реалности маєме арт-обєкты, културноє, історичноє, архітекторськоє наслїдство: скулптуры, муралы, ґрафіті, цирьквы и так дале. У Pokémon GO ґеймплей мало ся змістив на иманя покемонӯв, котрі могли ся спавнити хотьде на мапі, а не лиш у конкретных містах, айбо сисї иппен вызначні міста были схосновані ги «покестопы», на котрых мож было дӯстати предметы про иманя.

Типирь Niantic чинят далші крокы у бӯк екосістемізації своих продуктӯв: компанія додає у свӯй набор інштрументӯв про розробникӯв Lightship SDK сістему VPS авадь Visual Positioning System, котра приязує обєкты у доповненӯв реалности д реалным локаціям через аналіз того, што у конкретный момент видит камера девайса.

На розробку сістемы хосновали ся міліоны скенӯв реалных локацій на камеры мобілок: резултатом стало то, ож VPS уже пӯдпорує 30 000 міст, а у грубых части Сан Франсіско, Лондона, Токіо, Лос Анджелеса, Ню Йорка тай Сіетла сут VPS-мапы з точностьов до сантіметра.

Кроме того, сього тыждня выходит щий нова ґеолокаційна соціална сїтка Campfire, котра мала бы скапчати авдіторію Ingress, Pokémon GO тай сторонньых Lightship-аплікацій у єдному містї через ушелиякі інтеґрації тых сервісӯв.

Жерело: The Verge

Читайте нас на Twitter, Telegram тай Instagram