Мобілна аплікація Xbox поволит вам шырити контент из бавок у «історії»

Жерело: Microsoft

Фірма Microsoft у сесї дны обновлює свої мобілні аплікації на iOS тай Android, обы дати вам возмогу дїлити ся у соціалных сїтьох контентом из свойих бавок у формі «історій», за сесе ся каже у анонсови. Там ся мож дїлити скоро ушыткым: знимками еркана, выбраными моментами, досягненями, тай другым, через ґомбу «+» на головному екранови мобілної аплікації. Контент, котрый опубликуєте, буде там «висїти» далші 72 годины. (фіґля за тото ож XBox типирь тоже має історії)

Айно, додаваня історій было масовым трендом щи пару годӯв назад, Instagram, Linkedin, тай даже Spotify пробовали адаптовати сякый приступ, хоть не єднако добрі ся у всьых получило. Уже днись, так вызират, ож тот тренд затих, тай бӯлша частина днишньых соціалных сїтюв старавут ся адаптовати уже новый формат контента, котрый подабат на TikTok. На єден бӯк айно, історії сут добрым форматом на контент из бавок, бо фокус иде на візуалні алементы, айбо на другого бока чудно видїти горизонталноє відео у портретному режімови телефона, де сам контент занимат ачий лишек третину екрана. Видите исе такой на скрінови від Microsoft.

Жерело: The Verge

Читайте нас на Twitter, Telegram тай Instagram