За віртуалну фотоґрафію
Днись фоторежім у відеобавкох уже не є про нас ничим чудным: скоро кажда «дорога» бавка дає бавлячам у рукы віртуалну фотокамеру. Межи тым фотьканя рукотворных ціфровых світӯв тай йих жытелюв уже выростло в оддїлный вид умілства.
Мало того, не на єдно лиш умілство робит фоторежім! Про многі бавкы исе щий додаточный маркетінґовый інштрумент, бо каждый опубликована бавлячами (якыми бы вни аматорами ци професіоналами не были!) у соціалных сїтьох фотька тото безплатна «реклама».
Айбо ци знаєме, з чого ушытко ся зачало? Кого мож назвати заложительом, основоположником игрової фотоґрафії?
На бану, на йсе звіданя тяжко удповісти.
Тримле ся, ож первов бавков из фоторежімом тай повным контролом над камеров у нюм быв автосімулатор Gran Turismo 4 (2004). Айбо направду зачаткы фоторежіма мож было увидїти и у май старых плодах игрової індустрії — приміром, Pokémon Snap ищи у 1999. годї мав фотоґрафованя покемонӯв ги основну механіку. Бавлячі могли не просто свої фотькы з бавкы на картріджох Nintendo 64; у них была можнӯсть пӯйти з такыми картріджами у бовты Blockbuster Video тай Lawson, де йим печатали фізичні копії тотых фотьок.
Кидь за розвӯй фоторежіма тай його імплементацій у рӯзных бавкох ищи дашто знаєме, та из тыми, кому мож подяковати за помӯч трансформації игрової фотоґрафії у нову сферу умілства, не усьо так ясно.
Єднов из майранньых выставок віртуалної фотоґрафії называвут «Тринадсять майфайных аватарӯв» («Thirteen Most Beautiful Avatars») Евы тай Франко Матте (щи знамых пӯд псевдонімом 0100101110101101.org). Тота выставка проходила у 2006. годї у віртуалнӯв ґалереї у Second Life — типирь сисю онлайн-платформу назвали бы «метасвітом». На фотькох были зображені аватары з иппен тої Second Life.
Щи єднов вызначнов особов у сообществі игровых фотоґрафӯв є Frans «Otis_inf» Bouma. Вӯн не лем хоснує свӯй досвід фотоґрафічного реместла, переносячи го у сферу віртуалної фотоґрафії, а щий пише свої інштрументы на фотоґрафованя, додавучи аналоґы фоторежіма у тоты бавкы, де його не є. Айбо не убыйшло ся и без проблем из авторами бавок: у януарови 2022. года из Франсом зъязали ся представителї Crytek тай зажадали, обы фотоґраф удалив свӯй інштрументарій, учиненый про серію Crysis.
Говорячи за фоторежімы у бавкох, не мож не спомнити за NVIDIA Ansel — комплет інштрументӯв, котрый читаво розшыряв можности про игровоє фотоґрафованя на ґрафічных адаптерох NVIDIA. Посеред функцій Ansel были: слобӯдні навіґація тай масштабованя про ідеалный кадер; зниманя скріншотӯв из май высоков роздїльностьов ги монітор хосновача, HDR-фотоґрафій, фотосфер 360° тай VR-скріншотӯв; пост-оброблїня фотьок; а главноє, Ansel Software Development Kit (SDK) быв тай є приступный про любого розробника — каждый желавучый годен закласти у свӯй проєкт Unity 5, Unreal Engine 4 авадь Amazon Lumberyard пӯддержу Ansel. NVIDIA Ansel щи фунґує, айбо уже ся тримле «legacy» («застарїлым») тай не дӯстає обновлїня.
Читайте нас на Twitter тай Telegram