Сувсоздан чемпионга айланган Макрегор. Жон Кавана – “Конор Макгрегор. Қоидаларсиз ҳаёт” китоби
Ирландиялик оддий сувсоз қандай қилиб миллионлар тикиладиган ўйинчига айланди? Нега ўзингга бўлган ишончни ҳеч қачон йўқотмаслик керак? Қандай қилиб Конор Макгрегор UFC чемпионига айланди?
Конор Дублин шаҳрида оддий оилада, икки қиздан кейин туғилган ягона ўғил эди. Отаси оддий ишчи бўлган.
7 ёшигача футбол билан шуғулланишни орзу қилган Конор каттароқ болалардан кўчада ўзини ҳимоя қилишига тўғри келганлиги сабабли кейинчалик аралаш жанг санъатига қизиқа бошлади.
Мактабни битиргач, оиласининг жанг санъатини тушунмаслиги, “бу орқали пул ишлаб бўлмайди” деган мажбурловлар остида Конор отаси сингари сувсозлик касбини танлашга мажбур бўлади.
Шунга қарамай, Конор ўртоқлари билан яккакурашда шуғулланишни давом эттирди. Машғулотлар тўғри келган жойда, ҳатто ертўлада ҳам ўтарди.
2006 йилда тақдир тақозоси билан 18 ёшли озғин, боши калга қиртишлаган Конор аралаш жанг санъати мураббийси Жон Кавананинг машғулотлар залига келиб қолади ва у ерда мураббийсини учратади.
У куннинг асосий қисмини залда ўтказарди. Бутун куч ва шижоати билан машқ қилар, бошқа спортчиларнинг жанг техникасини ўзлаштиришга ҳаракат қилар, ҳаммадан ўзишга интиларди. Ва асосийси у бу интилишлари бир кун ўзини оқлашига ишонарди.
Инсайт №1
“Унутманг, мағлубият мавжуд эмас. Ёки ғалаба қозонасиз, ёки билим ва тажрибага эга бўласиз”
2007 йили Конор оддий ишқибоз сифатида, 2008 йилдан бошлаб эса профессионал жангларда қатнашишни бошлайди. Худди шу йили ўзининг биринчи профессионал жангидаёқ ғолибликка эришади. Хурсандчилигидан ҳатто капасини юлиб томошабинларга қараб отади. Капа эса томошабиннинг нақд юзига бориб урилади.
3-профессионал жанг 3 ойдан сўнг бўлиб ўтади. Конор литвалик Aртемий Ситенковга қарши жанг қилади. Конор чиройли ҳаракатлар билин ютишга уринганида, бу ҳаракатларни ўхшатолмаганлиги сабабли жангни ютқазади. Ситенков жангни партерга ўтказди, Конорнинг оёғини исканжага олиб уни мағлубиятга дучор этади.
Бу пайтда Конор мураббийси Жон Каванадан қарз ҳам эди, жангдаги мағлубиятдан кейин эса чўнтагидаги охирги тийинини ҳам бой берди. Охир-оқибат Конор бутунлай тушкунликка тушди.
Мағлубиятдан кейин Конор чуқур депрессияга тушиб, хонасига қамалиб олган, кўчада безорилар гуруҳига қўшилиб қолган эди. У ўз ҳаётини издан чиқара бошлади.
Бир ойдан сўнг Конорнинг онаси Жон Каванега қўнғироқ қилиб Конор билан кўришишини ва унга далда беришини илтимос қилади.
Бир куни у уйида кутилмаганда Жонни кутиб олади. Мураббий билан тортишувлардан кейин Конор хатоларини тан олиб, яхши томонга ўзгаришга сўз беради.
2010 йилнинг 27 ноябрида Конорнинг 6-профессионал жанги бўлиб ўтади. Шу пайтга қадар у 4 ғолиблик ва 1 мағлубиятга учраган эди. Унинг бу жанги Жозеф Даффига қарши ўтди. Жангнинг 20-сониясидаёқ Конор Жозефнинг юзини қонга белашга улгуради.
Лекин Даффи Конорнинг оёғидан ушлаб, курагини ерга теккизади ва Конорни бўғиш билан 38-сонияда уни навбатдаги мағлубиятга дучор этади.
Ҳафтани мағлубият билан тугатдан бўлса-да, Конор яна шижоат ва ғайрат билан машқ қилиш учун залга қатнашни давом эттиради.
Пулсизлик муаммоси давом этар, Конор сувсозлик билан шуғулланишни ҳам давом эттиришга мажбур эди. Кейинчалик у барибир бу касбини тарк этди...
Инсайт № 2
Пул бу омад маҳсули, аксинча эмас…
2013 йилга келиб Конор ишсизлиги туфайли давлат томонидан бериладиган нафақага қараб қолган, бутун вақтини спорт машғулотларга сарфлар эди. Конорнинг ягона олий мақсади UFC’да қатнашиш эди. UFC’да орзусидагидек пул ишлаб бойиб кетишига ва орзуларини рўёбга чиқаришига ишонарди.
Сўнгги мағлубиятидан кейин 8 маротаба ғалабага эришгна бўлса-да, ҳанузгача UFC’дан рад жавоблари келарди. Конор ўзига бўлган ишончни йўқота бошлади.
Бироқ… 2013 йилнинг 3 февралида UFC’дан узоқ кутилган қўнғироқ янгради. Унга Швецияда ўтказиладига турнирда қатнашиш таклифи билан чиқишганди.
Конор розилик билдирса, ҳозиргача бирон марта мағлубиятга учрамаган америкалик Маркус Бримежга қарши жанг қилишига тўғри келарди. У мисли кўрилмаган мураккаб танлов қаршисида турар, ниҳоят орзу сари қадам босишга қарор қилди.
Швецияга UFC’даги биринчи жангига қатнашиш учун жўнаш олдидан 188 евро миқдоридаги давлат нафақасига узун навбатда туриб пулни олиши керак, чунки бу пулсиз ҳеч қаерга бора олмасди.
Стокгольм. Швеция. 2013 йил 6 апрель. 19 минг томошабин жамланган жанг майдони. Атрофда кўзни қамаштирувчи чироқлар. Конорнинг эса ҳали ҳомийси ҳам йўқ. У оддий спорт кийими ва елкасида ватани Ирландия байроғи билан жанг майдонига кириб келди.
Ва ниҳоят жанг бошланди. Конор Бримежга кескин в аниқ зарбалар билан ҳамла қилишни бошлади. У ўз кучига ишонар, ҳайратланарли жанг ҳаракатларини ва оёқ зарбаларини намойиш этарди.
2-дақиқада Конор ўзининг бор имкониятини ишга солиб, рақибнинг бошига кетма-кет етказилган аниқ зарбалар билан уни нокаутга учратди.
UFC президенти жангдан ҳайратга тушди.
Ва ниҳоят Макгрегорнинг ҳаёти тубдан ўзгарди. UFC’да бир вақтнинг ўзида иккита вазн бўйича чемпионга айланиб, “вазн тофасидан қатъий назар UFC’нинг энг зўр жангчилари” учлигидан ўрин олди. У ўз мақсадига эришди ва камбағал сувсоздан миллионер жангчига айланди.
“Ўзимни чўққида ҳис қиламан. Нима қилишингдан қатъий назар, ўз ишингга муккасидан кетишинг, унга борлиғингни беришинг керак. Шунинг учун мен ўз ишимдан бошқасини билмайман ва бошқа ҳеч нарсага аҳамият бермайман ҳам”
Конор Макгрегор.
Хулоса. Китобнинг асосий ғояси.
Фақатгина ишонч ва мунтазам меҳнат сени муваффақият ва орзуларингга етаклайди. Конор Макгрегор ўзига ва ўз мақсадларига ишонар эди, ҳали ҳам ишонади ва ўзини бунга буткул бахшида қилади.
Aйнан шу уни оддий сувсоз устадан миллионерга ва UFC’нинг энг зўр жангчиларидан бирига айлантирди.
