August 8, 2023
Izleniw.
Ómir izleniwden tursa itimal.
İzlenemen, kúndiz qolımda shıraq.
«İzleseń tabarsań» degen de sóz bar,
Durıs-nadurısın sınap kórmedim biraq.
İzleymen jol júrip, kitap aqtarıp,
Jurttıń sózlerine qulaq salaman,
Samaldan sorayman shóllerge barıp,
Juldızlarǵa qarap oyǵa talaman.
İzleymen kún boyı bir kómik qazıp,
Terim jawırıma shıqqanǵa deyin.
İzleymen tún boyı qosıqlar jazıp,
Tańǵı uyqı kelip jıqqanǵa deyin.
Ańshı dúzge shıqsa izleydi tawshan,
Tırna jalǵız qalsa tırnasın izler,
Qızlar tań sáhárde bulaq basınan,
Aqsham túsip qalǵan sırǵasın izler.
Hasla taqatım joq, hasla tózbeymen.
Joq joyıtqan joqshıday salaman soraq.
Ómirim boyı bir nárseni izleymen,
Ne nárse ekenin bilmeymen biraq...