Pomenšajemo svoju vagu najvyše medloju i fantastično komplikovanoju metodoju

Ja hču hudnuti na 20 funtov. Kako mnogo zemnoj masy ja potrěbuju "prěměstiti" v kosmos, da by dosegnuti mojej cělje?

— Ryan Murphy, New Jersey

Zadanje izgledaje dostatočno prostym. Vaga (težina) pojavjaje se od toj pričiny, že gravitacija Zemje tegne nas na dol. Gravitacija Zemje pojavjaje se od jejnoj masy. Čim menša jest masa, tym menša je gravitacija. Oddali masu s Zemje – i ty budeš poměnšiti svoju vagu.

I ty rěšaješ poprobovati sdělati tuto.

Da by udaliti od Zemje veliku kolikost masy, potrěbno je prěmnogo energije, zato ty rěšaješ početi od prisvojenja vseh naftovyh rezervov planety.

— Mně sut potrěbne naftove rezervy vseh krajin. Nema časa objasnjati! — Ja jesm htěl zapytati načto, no on jasno skazal, že nema časa. — Nu, ako li to jest neodložno, nam trěba suglasiti se, da?

Ty prětvarjaješ naftu v palivo i koristaješ jego da by poslati sotnje miliardov ton kamenjev na orbitu. To bude odsěkti priblizno 0,2 milimetra od zemnoj povrhnje. Ty vstavaš na izměritelj vagy...

Nažalost ideja ne je uspěšna. Ale to je logično: několiko soten miliardov ton to je prěmnogo mala čest masy Zemje.

Tobě bude nemnogo pomogti spaljenje drugogo fosilnogo paliva, osoblivo vugolja, ktorogo na Zemji jest dostatočno mnogo. Tuto bude pomogti izbaviti se bez malogo od milimetra zemnoj povrhnje. [Možlivo, ljudi by počeli žaliti se. Ale, s drugoj strany, v tutoj milimetr by mogla vojdti zemja i smětky na poglogě. Možlivo, tuto by moglo projdti kako bezplatno očiščenje]. Ty iznova vstavaješ na izměritelj vagy...

Kurva!

Trěba vyše energije.

Ty pokryvaješ cělu planetu efektivnymi solnečnymi panelami i cěly god dostavaješ ves solnečny svět ktory padaje na Zemju, a potom koristaješ jego, da by davati energiju svojim metateljam kamenjev. Věrodostojno, ljudi už sut dostatočno zli na tebe.

— Nu, my možemo hot by žiti povyše od tutyh solnečnyh panelij? — Nema šansov! To bude zakryti solnce i pomenšiti efektivnost.

Solněčna energija, ktoru ty jesi dostal za jedin god, bude dati tobě dostatočno energije, da by izbaviti se bez malogo od 100 trilionov ton skaly - několiko centimetrov zemnoj povrhnje. Nažalost, tutogo ne jest dostatočno.

Očevidno, tvoja taktika povyšenja intensivnosti ne rabotaje.

Tobě potrěbno vyše močnosti. Zaměsto dostavanja jedino maloj česti od energije Solnca, ktora padaje ne Zemju, ty rěšaješ sbudovati sferu Dajsona, da by prěhvatiti cělu energiju Solnca.

Togda ty imaš už dostatočno energije, da by rězati Zemju mnogo vyše aktivno.

Čim glubje ty ideš, tym vyše gorečeju postavaje byti skala. Po srězanju několikyh soten metrov skaly ljudi počinajut viděti, že zemja dělaje se vyše teploju. Kogda ty jesi srězal kilometr skaly, temperatura povrhnje povysila se na 40 stupnjev Celsija. Věrojetno to jest dost komfortno kogda vstavaš iz ležišča hladnym jutrom, ale to dělaje život velmi diskomfortnym. Takož, od pričiny togo, že ty jesi odsěkl vršiny vseh geotermalno aktivnyh měst, vse vulkany světa počinajut erupciju.

— Biosfera umrěla i vse vulkany sut aktivne! — Nu, ale tutčas vsaky imaje teplu podlogu!

Ty prěgledaš izměritelj vagy.

Kurva!

Ty koristaš sferu Dajsona, da by izbavjati se od skaly dalje. Tutčas ty jesi srězal sloj 5 kilometrov, na čto bylo dostatočno 20 minut (Za sravnjenje: ješče několiko minut ty jesi potratil za izbavjenje od okeanov.) Zemja už absolutno ne je prigodna za život. Hvala magmě, ktora byla pod vulkanom Jelloustoun, sěvero-zapad Vajominga obratil se v jezero lavy. Zemja v bolšesti měst už jest dostatočno goreča, da by variti vodu i stimulovati požary.

Podloga je lava; podloga je v ognju; podloga je goreča; snosna podloga.

Ty iznova prěgledaš izměritelj vagy.

Normalno, trěba prosto izbavjati se od skaly i dalje, možlivo črez někaku ogromnu očiščalku ovočev, ktora rabotaje od solnečnyh panelij.

Ty srězaješ 20 kilometrov zemnoj kory i obnažaješ zemny plašč na prostorah, ktore někogda byli zajete dnom okeana.

Nu, nikto ne govoril, že hudnuti je legko. Ty snimaješ ješče 20 kilometrov, srězaješ plasty raztopjenogo plašča Zemje i male ostrovy kde skala leži gluboko.

Ty rabotaš dalje. Po četyrem časinam raboty planetarnoju očiščalkoju ty jesi udalil 6o kilometrov materije, ktora glavno je raztopjenoju skaloju. Ty iznova vstavaš na izměritelj vagy, i nakonec vidiš izměnjenja.

Jesi postal na jedin funt težše.

Kako to može byti?

Ako li by Zemja imala ravnoměrnu gustost, pri udaljenju slojev ty bys postaval vyše legkym. No čim glubje, tym vyše gustoju stavaje naša planeta, i tuta gustost nevtralizuje pomenšenje masy. Pri udaljenju zemnoj povrhnje planeta stavaje nemnogo legše, no i ty približaješ se k tutomu gustomu jedru. V koncu, udaljenje vněšnjego sloja Zemje dělaje gravitaciju na jejnoj povrhnji vyše silnoju.

Pri ponižanju, gravitacija raste i raste. Ona stabilizuje se jedino poslě togo, kogda ty budeš srězati priblizno 3 tyseči kilometrov, smenšajuči diametr Zemje napolovinu i odsěkajuči 2/3 jejnoj masy. (Na tutu cělj tvojej solnečnoj očiščalkě bude potrěbno priblizno sedm dnev.) Tvoja maksinalna težina bude dojdti do 207 funtov, a potom ona počne pomenšati se, kogda ty budeš srězati vněšnje jedro, ktoro imaje veliku gustost materije.

Po udaljenju 3450 kilometrov skaly tvoja vaga vračaje se k iznačelnoj cifrě. Poslě 3750 kilometrov skaly ty nakonec budeš dosegnuti svojego cělja pomenšiti svoju vagu na 20 funtov. K tutomu momenty ty jesi srězal 85% zemnoj masy. Ale svoju vagu ty jesi pomenšil!

Tutoj plan imaje slabosti. Da, on iznišči Zemju, no on takože je i prěmnogo neefektivnym. Jestvuje mnogo vyše prosta metoda pomenšenja gravitacijnoj atrakcije bez izměnjenja tvojej masy i oddaljenja od povrhnje.

Sferičny sloj materije ne tvori nikakyh gravitacijnyh sil na objekty, ktore sut vnutri njej, to znači že ako li ty budeš zakopati se pod zemju, sloje skaly nad toboju už ne budut vlivati na tvoju vagu. Od pogleda gravitacije one kako by budut izniknuti. Napravdu, tobě ne je trěba izbavjati se od masy Zemje, tobě je dostatočno prosto prokopati se v glubinu Zemje. Ty bys mogl izběgti vseh tyh trudov črez dost prostu tunelu.

— Ty bys mogl prosto prokopati tunelu. — Znaješ, ja ne mogu sěděti i čekati idealnogo plana. Najlěpše jest neprijatelj dobrogo.

Prinajmenje, jesi li ty smogl izběgti fizičnyh treningovanij? Nu, v někakom smyslu. V koncu, toj projekt potrěboval ogromnogo objema raboty. Za srězanje zemnoj povrhnje bylo trěba potratiti 5 x 1028 kalorij energije, čto je vyše, než bylo by spaljeno, ako li by cělo ljudstvo počelo dělati intensivne treningy 24 časiny v denj od tutogo dnja i do momenta kogda Solnce ne bude pogasnuti, a jego ostatky ohladiti se do 20 stupnjev Celsija.

Ako li tvoja cělj byla izběgti raboty, ty ne jesi mogl sdělati tuto ješče gorše.