В Индији три крокодили спасли из рєкы пса
Млады пес је забєжал в воду, когда хтєл спасти се од групы дикых псов, ктори сут гнали јего. Там јего смєста примєтили три крокодили, ктори сут плавали близко. Они направили се прємо ко псу, але замєсто того, абы јего сожрєти, крокодили неочекывано почели пхати јего својими носами, уводєчи јего од тој чести брєга, кде јего чекали дики пси, до другој, ктора была безпечна. Потом они помогли јему выјдти на брєг.
Научники сут велми удивјени од тутого поступанја крокодилов. Они мыслет, же туто јест знак, же крокодили могут имати емпатију к другым родам животин, але с увєрјеностју могут сказати само једну вєч — тути крокодили не были гладни.
Индијскы блатны крокодил може имати до 3,5 метров долгости и без малого 500 килограмов тежины. О факту спасенја пса мы јесмо узнали хвала тому, же индијски научники имајут велику работу на тему изученја живота тых крокодилов, за кторыми они слєдили нєколико лєт. Срєд другых фактов научники сут узнали, же крокодили умєјут ловити жртвы заједно, а такоже од нєкакого повода имајут велику љубов к цвєткам календулы.
Туте факты говорет нам, же крокодили сут дружни хлапци, ктори спасајут животины и љубет цвєткы. Ну како јих не љубити?!