$1’000’000 byl izpuščeny iz helikoptera v Čehiji

Češsky kinoproducent, aktor, investor i vlivna osoba Kamil Bartošek, vyše znajemy gledačam pod sceničnym psevdonimom Kazma Kazmitch, je izpustil milion dolarov Sjedinjenyh Štatov Ameriky iz helikoptera blizko k češskomu gradu Lysá nad Labem.

Valuta je početkovo byla nagradoju za učestnika, koj bude održati pobědu – takovy naměr je iměl Kamil. Ješče v devetom měsecu on je opublikoval video, kde zatvarjaje milion dolarov jednodolarovymi banknotami v kontejneru zamkom. Toj zamok je možno odkryti jedino s pomočju razšifrovanogo koda iz jego avtorskogo filma ONEMANSHOW: The Movie, ktory je šel v kinoteatrah v koncu osmogo měseca. Poneže nikomu iz gledačev ne je udalo se razšifrovati kod, on je rěšil razděliti dolary medžu vsimi učestnikami, zaregistrovavšimi se v loteriji.

Na 22 denj 10 měseca v šest časin jutra okolo 100’000 ljudij je prijelo elektronično pismo s poslanjem, kde i kogdy dolary budut izpuščene iz helikoptera, prěvozečego kontejner. Jim je bylo trěba razšifrovati kod, da by uznati tu informaciju. Nakonec v tom městu je sobralo se až okolo 4’000 ljudij.

V socialnyh sětah razprostirajut se videa, kde je možno uviděti desetki ljudi, ktori běgajut po polju i starajut se vtisknuti veče jednodolarovyh banknot v pakety i rukzaky. Něktori iznahodlivi ljudi sut domyslili se loviti toj dolarovy dožd v obračene otkryte doždniky.

Na každoj banknotě je byl prikrěpjeny QR code s linkom do onlajn-platformy, kde učestniki by smogli požrtvovati banknoty na dobročinnost. Podle togo polja sut prisutstvovali policijniki, požarniki, lěkari i rabotniki služby bezpečnosti, jednako, po danyh medij, vměšanja ne bylo.

Originalny članok: https://slovenia.postsen.com/world/185009/Money-was-falling-from-the-sky-a-Czech-threw-a-million-dollars-among-people-VIDEO.html