​​$1’000’000 был изпушчены из хеликоптера в Чехији

$1’000’000 был изпушчены из хеликоптера в Чехији

Чешскы кинопродуцент, актор, инвестор и вливна особа Kamil Bartošek, выше знајемы гледачам под сценичным псевдонимом Kazma Kazmitch, је изпустил милион доларов Сједињеных Штатов Америкы из хеликоптера близко к чешскому граду Lysá nad Labem.

Валута је почетково была наградоју за учестника, кој буде одржати побєду – таковы намєр је имєл Kamil. Јешче в деветом мєсецу он је опубликовал видео, кде затварјаје милион доларов једнодоларовыми банкнотами в контејнеру замком. Тој замок је можно одкрыти једино с помочју разшифрованого кода из јего авторского филма ONEMANSHOW: The Movie, кторы је шел в кинотеатрах в концу осмого мєсеца. Понеже никому из гледачев не је удало се разшифровати код, он је рєшил раздєлити долары меджу всими учестниками, зарегистровавшими се в лотерији.

На 22 дењ 10 мєсеца в шест часин јутра около 100’000 људиј је пријело електронично писмо с посланјем, кде и когды долары будут изпушчене из хеликоптера, прєвозечего контејнер. Јим је было трєба разшифровати код, да бы узнати ту информацију. Наконец в том мєсту је собрало се аж около 4’000 људиј.

В социалных сєтах разпростирајут се видеа, кде је можно увидєти десетки људи, ктори бєгајут по пољу и старајут се втискнути вече једнодоларовых банкнот в пакеты и рукзакы. Нєктори изнаходливи људи сут домыслили се ловити тој доларовы дожд в обрачене открыте дождникы.

На каждој банкнотє је был прикрєпјены QR code с линком до онлајн-платформы, кде учестники бы смогли пожртвовати банкноты на доброчинност. Подле того поља сут присутствовали полицијники, пожарники, лєкари и работники службы безпечности, једнако, по даных медиј, вмєшанја не было.

Оригиналны чланок: https://slovenia.postsen.com/world/185009/Money-was-falling-from-the-sky-a-Czech-threw-a-million-dollars-among-people-VIDEO.html