Коти и шизофренија
Јапонско изслєдованје, проведено на 11 тысечах људиј од 65 до 84 лєт, показало, же иманје пса поменшаје вєројетност појавјенја старечској деменције приблизно о 40%, а иманје кота не поменшаје никако.
Но то јешче не јест всечто: австралијско изслєдованје говори, же властники котов имајут двукратно вечши ризик шизофреније.
Что то је, дискриминација котов? Или можливо котки пробујут управјати људскым мозгом, да бысмо давали јим много једива? Капибара створила мало изслєдованје тој темы:
Токсоплазма и кде она живе
Јествује такы паразит, кторы може имати мужско-женско размноженје само в котках, може жити в мозгу, и даже принуджаје мыши љубити котов. Можно он дєлаје проблемы и људам? Попробујемо погледати, је ли то заисто тако. Итак:
Хот статистика говори нам, же заразни сут менје 1% од всих котов, 15-40% од всих котов были нєкогда инфиковани токсоплазмоју.
Океј, а могут ли људи быти инфиковани? Нажалост да, здравы имунитет може схранити нас од симптомов, але 25-30% људиј на планетє имајут антитєла к тому паразиту. Како примєр, в Чехији то јест 29% од всих људиј.
Мы јесмо уже без малого пришли к одговору, и тутчас трєба провєрити само двє вєчи: како много властников коток је имало контакт с токсоплазмоју, и повышаје ли она направду вєројетност психичных проблемов.
Анализа из мексиканского града Guadalajara говори, же противо-токсоплазмове антитєла IgG сут најдене у 64% људиј, ктори имајут котков. Охо, то јест достаточно много! Не имамо причину вєрити на 100% работє, в кторој было тестовано једино 60 људиј, але то јест лєпје неж ничто. Друга работа показываје нам, же чишченје говна од коткы заисто јест фактор ризика (но сут и друге факторы, напримєр мытје ножа по работанју с сырым месом јест выше важно).
Анализа свези токсоплазмы и шизофреније такоже не говори нам ничего оптимистичного, привидно та свез направду јествује. Так, мета-анализованје 66 разных научных работ показало, же в 2/3 из њих јест најдена значна свез меджу токсоплазмозом и шизофренијеју.
Изслєдованје доноров крви в Данији такоже говори о силној свези: анализованје 80 000 људиј показало, же људи с антитєлами к Toxoplasma gondii сут имали повышенје вєројетности шизофреније на 47%, а фокусованје на 28 људиј ктори сут достали диагноз послє контакта с инфекцијеју, показало, же она повысила вєројетност в 2.5 разы.
"То число сугласује се с другыми великыми корелацијными изслєдованјами, кторе такоже показывајут повышенје вєројетности диагнозы шизофреније у зараженых људиј в 2,5 разы", говори Роберт Йолкен, виролог из Медикинској школы Универзитета Джонса Хопкинса в Балтимору (штат Maryland) и једны из авторов изслєдованја. Але зато что шизофренија јест редка болєст, инфекција једино не тако силно повышаје шансы захворєти - од, приблизно, једного шанса из 100 до двох-трєх из 100.
Можете честитати нашего капибарного детектива, затоже пытанје јест разкрыто. Но како мы можемо схранити котков и себе од тутого провокатора психичных проблемов?
Направду, рекомендације давно јествујут. Мыјте рукы регуларно, мыјте ноже и доскы по разрєзанју свєжего меса, регуларно утилизујте котји тоалет, и всечто буде добро. А јестли вы јесте строгы тиран, можете не одпускати својего кота из дома, зато что научники из Таиланда сут изчислили, же домашњи коти в тутој крајинє имајут само 1.5% вєројетност достати токсоплазму, то је 7-кратно менши шанс неж имајут коти, ктори свободно ходет кде хчут (11.5%).
