Koti i šizofrenija
Japonsko izslědovanje, provedeno na 11 tysečah ljudij od 65 do 84 lět, pokazalo, že imanje psa pomenšaje věrojetnost pojavjenja starečskoj demencije priblizno o 40%, a imanje kota ne pomenšaje nikako.
No to ješče ne jest vsečto: avstralijsko izslědovanje govori, že vlastniki kotov imajut dvukratno večši rizik šizofrenije.
Čto to je, diskriminacija kotov? Ili možlivo kotki probujut upravjati ljudskym mozgom, da bysmo davali jim mnogo jediva? Kapibara stvorila malo izslědovanje toj temy:
Toksoplazma i kde ona žive
Jestvuje taky parazit, ktory može imati mužsko-žensko razmnoženje samo v kotkah, može žiti v mozgu, i daže prinudžaje myši ljubiti kotov. Možno on dělaje problemy i ljudam? Poprobujemo pogledati, je li to zaisto tako. Itak:
Hot statistika govori nam, že zarazni sut menje 1% od vsih kotov, 15-40% od vsih kotov byli někogda infikovani toksoplazmoju.
Okej, a mogut li ljudi byti infikovani? Nažalost da, zdravy imunitet može shraniti nas od simptomov, ale 25-30% ljudij na planetě imajut antitěla k tomu parazitu. Kako priměr, v Čehiji to jest 29% od vsih ljudij.
My jesmo uže bez malogo prišli k odgovoru, i tutčas trěba prověriti samo dvě věči: kako mnogo vlastnikov kotok je imalo kontakt s toksoplazmoju, i povyšaje li ona napravdu věrojetnost psihičnyh problemov.
Analiza iz meksikanskogo grada Guadalajara govori, že protivo-toksoplazmove antitěla IgG sut najdene u 64% ljudij, ktori imajut kotkov. Oho, to jest dostatočno mnogo! Ne imamo pričinu věriti na 100% rabotě, v ktoroj bylo testovano jedino 60 ljudij, ale to jest lěpje než ničto. Druga rabota pokazyvaje nam, že čiščenje govna od kotky zaisto jest faktor rizika (no sut i druge faktory, napriměr mytje noža po rabotanju s syrym mesom jest vyše važno).
Analiza svezi toksoplazmy i šizofrenije takože ne govori nam ničego optimističnogo, prividno ta svez napravdu jestvuje. Tak, meta-analizovanje 66 raznyh naučnyh rabot pokazalo, že v 2/3 iz njih jest najdena značna svez medžu toksoplazmozom i šizofrenijeju.
Izslědovanje donorov krvi v Daniji takože govori o silnoj svezi: analizovanje 80 000 ljudij pokazalo, že ljudi s antitělami k Toxoplasma gondii sut imali povyšenje věrojetnosti šizofrenije na 47%, a fokusovanje na 28 ljudij ktori sut dostali diagnoz poslě kontakta s infekcijeju, pokazalo, že ona povysila věrojetnost v 2.5 razy.
"To čislo suglasuje se s drugymi velikymi korelacijnymi izslědovanjami, ktore takože pokazyvajut povyšenje věrojetnosti diagnozy šizofrenije u zaraženyh ljudij v 2,5 razy", govori Robert Yolken, virolog iz Mediсinskoj školy Univerziteta Jonsa Hopkinsa v Baltimoru (štat Maryland) i jedny iz avtorov izslědovanja. Ale zato čto šizofrenija jest redka bolěst, infekcija jedino ne tako silno povyšaje šansy zahvorěti - od, priblizno, jednogo šansa iz 100 do dvoh-trěh iz 100.
Možete čestitati našego kapibarnogo detektiva, zatože pytanje jest razkryto. No kako my možemo shraniti kotkov i sebe od tutogo provokatora psihičnyh problemov?
Napravdu, rekomendacije davno jestvujut. Myjte ruky regularno, myjte nože i dosky po razrězanju svěžego mesa, regularno utilizujte kotji toalet, i vsečto bude dobro. A jestli vy jeste strogy tiran, možete ne odpuskati svojego kota iz doma, zato čto naučniki iz Tailanda sut izčislili, že domašnji koti v tutoj krajině imajut samo 1.5% věrojetnost dostati toksoplazmu, to je 7-kratno menši šans než imajut koti, ktori svobodno hodet kde hčut (11.5%).
Druge naše teksty možete uviděti na kanalu «Medžuslovjanska Kapibara» v Telegram