Нєктори звєри сут одпорни к алкохолу лєпје неж људи, а другым не јест можно сдєлати даже малы голток. Од чего то зависи?

За чловєка алкохол то јест не просто легкы наркотик, но даже цєлы социокултурны феномен. Мы варимо пиво уж 13 000 лєт, а нєктори научники имајут увєрјеност, же прве пробы одомашнити растлины сут свезане именно с желанјем достати вече алкохола. Не јест дивно, же за тако долгы час наш организм је смогл неслабо адаптовати се к употрєбјенју алкохола. Але, како можно увидєти, сут животины, кторе смогли осилити туто лєпје неж мы!

Главну рољ в људској одпорности к етанолу играје ензим алкохолхидрогеназа. Јего задача јест раздєљенје алкохола на компоненты. Научники рєшили сут провєрити, имајут ли тутој ензим други звєри, и како он је свезаны с јих одпорностју к алкохоловому опитју.

И тута свез направду јествује. Месожерци, напримєр, обычајно или совсєм не имајут алкохолхидрогеназу, или ген, кторы јест одговорны за јејну работу, јест сломјены. И вси они не сут велми добри партнери за пијанство. В интернету јест прємного видеј с котками, кторе были послане в нокаут од нєколикых голтков слабого алкохола. Но мы абсолутно не совєтујемо повтарјати туто с вашими домашными љубимцами. Етанол мочно бије по печењи/јетрє всакого месожерца, а јих јутришно похмеље (мамурлук/коцовина) буде прєзмєрно тежко.

Највыше добро тој ензим работаје у приматов и једајучих плоды нетопырев, нєкторе јих роды аж достали јего улєпшену версију, ктора повышаје ефективност разшчепјенја алкохола в десеткы раз! Да бы достати тутој еволуцијны бонус, јест достаточно регуларно једати сочне и богате на вуглеводы плоды (а оне често сут ферментоване).

Но даље починајут се проблемне моменты. Наука је довєдєла се, же слони и коњи такоже могут достаточно добро осиљати алкохол. И то јест логично, зато что они љубет једати и плоды и зрно. Але алкохолхидрогеназу они не имајут! Не јест полно јасно, что обрањаје јих од деструктивных ефектов алкохола. Највыше популарна теорија говори, же тутој проблем рєшаје микрофлора в јих чрєву.

Но всих нас: коњев, слонов, људиј и нетопырев изнишчили сут... хомјаки (хрчки). И то је даже без всакых дехидрогеназ! Јих хепа/печењ прємного ефективно раздєљаје етанол на компоненты. Тути грызуни могут употрєбјати до 18 грам етанола на једин килограм својеј масы в једин дењ, и даже не поставати прємного опитыми. Ако ли сравнити хрчков и људиј, за чловєка безпечна норма алкохола јест од 4 до 12 грамов алкохола на килограм в ЈЕДНУ СЕДМИЦУ.

Вєродостојно, така мочна способност к употрєбјенју алкохола развила се у њих једночасно со сбиранјем запасов на зиму. Хрчки скрывајут в својих норах достаточно сємен и јагод, да бы једати је цєлу зиму. За такы долгы час в резервах једива всегда починаје се ферментација, и хрчек потрєбује доживати до весны на алкохоловых јагодах.

Зато, најпрво грызуни научили се ликвидовати алкохол, а потом и доставати из њего енергију! В лабораторној обсрєдинє хомјаки преферујут алкохолне напоје прєд чистоју водоју. Хрчки не опивајут се од њих, але высококалоричны алкохол даваје јим енергију! Фактично, звєрета уживајут јего како енергетично једиво.

Оригинал: https://pikabu.ru/story/odni_zhivotnyie_ustoychivyi_k_alkogolyu_luchshe_lyudey_a_drugim_nelzya_dazhe_malenkogo_glotka_ot_chego_yeto_zavisit_9902734

Друге наше чланкы можете увидєти в каналу «Меджусловјанска капибара»