Yoshlarning ovozini eshitish muhim

Yoshlar – jamiyatning yuragi, ularning muammolarini tinglash esa rivojlanishning muhim sharti. Ko‘ksaroyda o‘tgan ochiq muloqotda ularning talab va istaklariga alohida e’tibor qaratildi. Bandlik, uy-joy masalasi va tadbirkorlikni qo‘llab-quvvatlash bo‘yicha aniq rejalarga start berildi. Endi yoshlarning fikri nafaqat eshitiladi, balki amalda ham qo‘llab-quvvatlanadi.
           Yoshlarning ovozi nafaqat eshitilishi, balki ularning fikrlari asosida amaliy qarorlar qabul qilinishi jamiyat taraqqiyoti uchun muhimdir. Shu bois, Prezident bilan uchrashuvda yoshlarning ijtimoiy muammolarini hal etish, ularning tashabbuslarini qo‘llab-quvvatlash va islohotlarni ular bilan birga olib borish zarurligi ta’kidlandi. Yoshlar parlamenti, yosh tadbirkorlarni rag‘batlantirish dasturlari va innovatsion loyiha tanlovlari orqali ularning jamiyatdagi o‘rnini mustahkamlash choralari ko‘rilmoqda.
         Shuningdek, muloqot davomida yoshlarning ta’lim olish, ishga joylashish va uy-joy masalalarini hal etish bo‘yicha yangi dasturlar ishlab chiqilishi ma’lum qilindi. Ijtimoiy himoyaga muhtoj yoshlar uchun imtiyozli kreditlar, zamonaviy kasblarga yo‘naltirilgan bepul kurslar va tadbirkorlikni rivojlantirish uchun grant ajratish rejalashtirilmoqda. Barcha bu tashabbuslar yoshlarning hayotini yaxshilash, ularning salohiyatini to‘laqonli ro‘yobga chiqarish va o‘z kelajagini mustahkamlashga qaratilgan.
           Eng muhimi, yoshlarning jamiyatdagi ishtiroki faqat so‘z bilan cheklanmay, amaliy natijalar bilan mustahkamlanmoqda. Endilikda ular davlat boshqaruvidan tortib, iqtisodiyot, madaniyat va texnologiya sohalarigacha faol ishtirok etishi, o‘z fikrlarini bildirish va hayotga tatbiq etish imkoniyatiga ega bo‘ladilar. Bu esa, o‘z navbatida, jamiyat taraqqiyotini yangi bosqichga olib chiqadigan muhim omildir.