Кийиниш жойларига камера ўрнатиш ман этилади

Адлия вазирлиги шахс тасвирига оид ҳуқуқларни кучайтириш мақсадида қонун лойиҳасини ишлаб чиқди. (https://t.me/adliyangiliklari/19075) Унга кўра, шахснинг фото ёки видео тасвиридан фойдаланиш учун унинг (16 ёшгача бўлса ота-онасининг) розилиги талаб этилади.

Бироқ қуйидаги ҳолатларда розилик талаб этилмайди:

—қидирув эълон қилинганда;
—жамоат жойлари ва оммавий тадбирларда;
—маъмурий ҳуқуқбузарлик ёки жиноят ҳақида хабар беришда;
—тасвир очиқ манбаларда жойлаштирилган бўлса;
—жамоат тартиби ва хавфсизлик мақсадида видеокузатув орқали тасвирга олишда.

Қонун лойиҳасига кўра, давлат хизматчиларини вазифасини бажараётганда розилигисиз тасвирга олиш ва уни тарқатиш мумкин бўлади.

Бундан ташқари, кишилар қисман ёки тўлиқ кийимсиз бўладиган жойларда видеокузатув камераларини ўрнатиш ва шахсларни тасвирга олиш тақиқланмоқда.

Ходимни тасвирга олиш, ушбу тасвирлардан фойдаланиш учун уни олдиндан огоҳлантириш ва розилигини олиш тартиби белгиланади.

Лойиҳа билан шахсий ва оилавий сирларни ташкил этувчи ахборотни тўплаш ёки тарқатиш мақсадида ахборотни яширинча олишга мўлжалланган техника воситаларидан фойдаланиш учун маъмурий жавобгарлик кўзда тутилган.