"Югра ўзбекларнинг ватани" деган депутат маошидан маҳрум қилинди

"Югра – ўзбекларнинг тарихий ватани" деб айтган КПРФ (Россия Федерацияси Коммунистик партияси) депутати Холид Таги-Заде маошидан маҳрум қилинди. Бу ҳақда РИА Новости нашри хабар берди.

"Мен ҳеч кимни ҳақорат қилмоқчи эмас эдим… Одамлар бу ерга фақат давлат бюджетига ёпишиб олиш учун келмаётган бўлиши мумкинлигини айтмоқчи эдим. Балки улар яхши ниятда келаётгандир, умумий маданият, умумий тарих борлигини, Россиянинг бир қисми бўлишни исташаётганини ҳис қилаётгандир. Ҳаммаси эмас, баъзилари", — дейди депутат.

Хабарга кўра, Таги-Задега иш ҳақи тўланмаслиги унинг парламент ва қўмита мажлисларини кўп ўтказиб юборгани ҳамда депутатлик вазифаларини амалда бажармаётгани билан ҳам боғлиқ бўлиши мумкин.

Якуний хулосага кўра, Таги-Заде фақат маошдан маҳрум қилинган, лекин унинг депутатлик мандати сақланиб, ижтимоий ривожланиш қўмитаси таркибида ишлашда давом этиши маълум қилинди.

Маълумот учун, май ойининг охирида Таги-Заде Думада бўлиб ўтган йиғилишда мигрантлар, жумладан ўзбеклар, Юграга "тарихий ватанига келаётганини" айтган. Бу баёнот жамоатчиликда резонанс уйғотган. Можародан сўнг Таги-Заде ижтимоий ривожланиш қўмитаси раис ўринбосари лавозимидан ҳам маҳрум қилингани, дейилади хабарда.