Ўзбекистонлик бизнес вакили Парижда ўғирлаб кетилди
Ўзбекистонлик тадбиркор Қаҳрамонжон Олимовни Парижда ўғирлаб кетган шахслар ундан 10 млн доллар талаб қилган, деб ёзди Le Monde. Франциядаги терговчилар билан суҳбатда у ўғрилардан бирини банкирнинг собиқ шериги билан боғлиқ бўлган «қонундаги ўғри» деб атади.
Le Monde нашри ўзбекистонлик 48 ёшли тадбиркор ва банкир Қаҳрамонжон Олимовнинг ўғирланиш ҳикоясини эълон қилди. Материал учун жабрланувчининг француз бандитизмига қарши кураш бригадаси (BRB) кўрсатмалари манба бўлди.
Ҳаммаси қандай содир бўлди?
Тадбиркор Парижга июнь ойи охирида учиб борган — у Францияга тез-тез бориб турган ва бу сафар ҳам француз ҳамкорлари билан учрашиш учун сафарни режалаштирган. Бундан ташқари, у кўчмас мулкни сотиб олиш бўйича битимни якунламоқчи бўлган.
21 июнь куни у котиби билан Тошкентдан Парижга учиб борган. Ўша куни кечқурун меҳмонхона барида унинг олдига ўзини Анастасия деб таништирган нотаниш қиз келган. Тахминан 25 ёшлардаги, «узун қора сочли», «кавказ типидаги» қиз унга рус ва инглиз тилларида гапирган, Туркиядаги гўзаллик салонида ишлашини айтган, бироқ, Олимовнинг таъкидлашича, ҳашаматли аксессуарлар — Louis Vuitton пиджаги ва Tiffany билагузуги қизнинг сўзларига мос келмасди.
Тадбиркор унга ўзининг телефон рақамини берган, бироқ ўша оқшом яна учрашиш таклифини рад этган. Эртаси куни эрталаб, деб ёзади нашр, Олимов Анастасия унга деярли тун бўйи хабарлар юборганини кўрган, сўнгра қизнинг балиқ ресторанида тушлик қилиш таклифига рози бўлган.
Улар меҳмонхонадан бир неча қадам наридаги Жорж Гийомен майдонига етиб келишганда уларни қалин соқолли нотаниш киши тўхтатган.
«Кетдик, гаплашиб олишимиз керак», — деган эркак рус тилида кучли «чеченча акцент» билан. Шу пайт яна икки эркак бўғиш усулини қўллаб, банкирнинг қўлларини қайириб, уни микроавтобусга мажбурлаб ўтирғизган. Олимов қўлидаги телефонни қизга «Полицияни чақир!» дея бақириб улоқтиришга улгурган, бироқ қиз бундай қилмаган.
«Ниҳоят сени тутдик!»
Банкирнинг сўзларига кўра, микроавтобус баланд панжарали уйгача бир неча соат юрган. У ерда Олимов ўғрилардан бирини қиёфасидан таниган, уни «қонундаги ўғри» ва нуфузли жиноий гуруҳ аъзоси деб атади.
Унинг сўзларига кўра, бу шахс Олимовнинг йирик банкдаги собиқ шериги Б.Р.нинг ишончли вакили ҳисобланади (2017 йилда Олимов «Капиталбанк»да бошқарув раиси бўлиб ишлаган, у ерда унинг 36 фоиздан ортиқ улуши бўлган). Тахминан ўн йилдан бери бу собиқ ҳамкор Олимовни, унинг Туркияга «қувғин қилинган ва вақтинчалик бадарға бўлган» пайтидан фойдаланиб, банкдаги улушини сотиб олганликда айблаб келади.
Ўғрилардан бири: «Ниҳоят сени тутдик! Сен мендан 10 миллион доллар қарзсан», — деган ва Олимовни урган.
Le Monde`нинг ёзишича, кейин уч соат давомида калтаклашлар ва осиб ўлдириш инсценировкаси содир бўлган. Шундан сўнг банкирни яна фургонга ўтқазиб, Ниццадаги вилланинг ертўласига олиб кетишган. Уни «уй кинотеатри»га айлантирилган хонага жойлаштиришган, у ерда уни ушлаб туришган ва қийноққа солишда давом этишган.
Ўғирлаганлардан бири Олимовнинг Европадаги активлари ва инвестициялари ҳақида билишини айтиб, тадбиркорнинг фарзандлари ҳақида гапирган ва банкирнинг шахсий котибини ҳам ўғирлаш билан таҳдид қилган.
Охир-оқибат Олимовни 5 млн долларлик қарз ҳақида тилхат олишга мажбур қилишган. Тадбиркор ҳайдовчиси орқали Тошкентдаги воситачига 200 минг доллар аванс ўтказиб берган.
Озод қилиш ва тергов
Бу илк тўлов ўғирлаганларга гаровдаги шахсни озод қилиши учун етарли бўлган. Олимовни Ницца вокзалига олиб боришган, у ердан поездда Парижга кетган ва дарҳол полицияга мурожаат қилган. Франция полицияси уюшган гуруҳ таркибида ўғирлаш бўйича иш очган ва «турк миллатига мансуб» бир гумонланувчини қўлга олган.
Олимов сўроқдан сўнг дарҳол Тошкентга қайтиб, ўз хавфсизлигини таъминлаш учун қўриқчи ёллаган. Бироқ, нашрнинг ёзишича, ўғриликнинг тахминий ташкилотчиси унга Telegram орқали таҳдид ва талаблар юборишда давом этмоқда. Шунингдек, у полицияга қилинган мурожаатдан ҳайрон бўлиб, буларнинг барчаси «ҳазил» эканини айтган.
Қаҳрамонжон Олимов 2020 йилда ташкил этилган ва «миллиард доллардан ортиқ активларга эга» Anorbank рақамли банки акцияларининг 99,38 фоизига эгалик қилади, шунингдек, Нидерландияда рўйхатдан ўтган компания орқали Сурхондарё вилоятида EDF билан биргаликда комбинацияланган циклли газ турбинали электр станциясини қуриш лойиҳасида иштирок этади.
Шунингдек, тадбиркор Milliy To‘lov Tizimlari (Hamyon хизмати), Clever Mikromoliya Tashkiloti, Distri For Country (тўловларни йиғиш агентликлари ва кредит бюролари фаолияти), Anor Assets (молиявий лизинг) ва Dynamic Energy (иссиқлик электр станциялари томонидан электр энергияси ишлаб чиқариш) компанияларида улушларга эга. 2023 йилда у Ўзбекистондаги bi1 (Франция супермаркетлар тармоғи) компаниясининг ҳаммуассиси бўлгани ҳақида хабар берилганди.
ОАВда акциядор ўғирлангани ҳақида тарқалган хабарлардан сўнг Anorbank ҳодиса хусусий характерга эга экани ва молия муассасаси фаолиятига таъсир кўрсатмаслиги ҳақида баёнот берди. Филиаллар ва хизматлар барқарор ишламоқда, дея таъкидлади банк.
### ### ###
O`zbekistonlik bines vakili Parijda o`g`irlab ketildi
O‘zbekistonlik tadbirkor Qahramonjon Olimovni Parijda o‘g‘irlab ketgan shaxslar undan 10 mln dollar talab qilgan, deb yozdi Le Monde. Fransiyadagi tergovchilar bilan suhbatda u o‘g‘rilardan birini bankirning sobiq sherigi bilan bog‘liq bo‘lgan «qonundagi o‘g‘ri» deb atadi.
Le Monde nashri o‘zbekistonlik 48 yoshli tadbirkor va bankir Qahramonjon Olimovning o‘g‘irlanish hikoyasini e’lon qildi. Material uchun jabrlanuvchining fransuz banditizmiga qarshi kurash brigadasi (BRB) ko‘rsatmalari manba bo‘ldi.
Hammasi qanday sodir bo‘ldi?
Tadbirkor Parijga iyun oyi oxirida uchib borgan — u Fransiyaga tez-tez borib turgan va bu safar ham fransuz hamkorlari bilan uchrashish uchun safarni rejalashtirgan. Bundan tashqari, u ko‘chmas mulkni sotib olish bo‘yicha bitimni yakunlamoqchi bo‘lgan.
21 iyun kuni u kotibi bilan Toshkentdan Parijga uchib borgan. O‘sha kuni kechqurun mehmonxona barida uning oldiga o‘zini Anastasiya deb tanishtirgan notanish qiz kelgan. Taxminan 25 yoshlardagi, «uzun qora sochli», «kavkaz tipidagi» qiz unga rus va ingliz tillarida gapirgan, Turkiyadagi go‘zallik salonida ishlashini aytgan, biroq, Olimovning ta’kidlashicha, hashamatli aksessuarlar — Louis Vuitton pidjagi va Tiffany bilaguzugi qizning so‘zlariga mos kelmasdi.
Tadbirkor unga o‘zining telefon raqamini bergan, biroq o‘sha oqshom yana uchrashish taklifini rad etgan. Ertasi kuni ertalab, deb yozadi nashr, Olimov Anastasiya unga deyarli tun bo‘yi xabarlar yuborganini ko‘rgan, so‘ngra qizning baliq restoranida tushlik qilish taklifiga rozi bo‘lgan.
Ular mehmonxonadan bir necha qadam naridagi Jorj Giyomen maydoniga yetib kelishganda ularni qalin soqolli notanish kishi to‘xtatgan.
«Ketdik, gaplashib olishimiz kerak», — degan erkak rus tilida kuchli «chechencha aksent» bilan. Shu payt yana ikki erkak bo‘g‘ish usulini qo‘llab, bankirning qo‘llarini qayirib, uni mikroavtobusga majburlab o‘tirg‘izgan. Olimov qo‘lidagi telefonni qizga «Polisiyani chaqir!» deya baqirib uloqtirishga ulgurgan, biroq qiz bunday qilmagan.
«Nihoyat seni tutdik!»
Bankirning so‘zlariga ko‘ra, mikroavtobus baland panjarali uygacha bir necha soat yurgan. U yerda Olimov o‘g‘rilardan birini qiyofasidan tanigan, uni «qonundagi o‘g‘ri» va nufuzli jinoiy guruh a’zosi deb atadi.
Uning so‘zlariga ko‘ra, bu shaxs Olimovning yirik bankdagi sobiq sherigi B.R.ning ishonchli vakili hisoblanadi (2017 yilda Olimov «Kapitalbank»da boshqaruv raisi bo‘lib ishlagan, u yerda uning 36 foizdan ortiq ulushi bo‘lgan). Taxminan o‘n yildan beri bu sobiq hamkor Olimovni, uning Turkiyaga «quvg‘in qilingan va vaqtinchalik badarg‘a bo‘lgan» paytidan foydalanib, bankdagi ulushini sotib olganlikda ayblab keladi.
O‘g‘rilardan biri: «Nihoyat seni tutdik! Sen mendan 10 million dollar qarzsan», — degan va Olimovni urgan.
Le Monde`ning yozishicha, keyin uch soat davomida kaltaklashlar va osib o‘ldirish inssenirovkasi sodir bo‘lgan. Shundan so‘ng bankirni yana furgonga o‘tqazib, Nissadagi villaning yerto‘lasiga olib ketishgan. Uni «uy kinoteatri»ga aylantirilgan xonaga joylashtirishgan, u yerda uni ushlab turishgan va qiynoqqa solishda davom etishgan.
O‘g‘irlaganlardan biri Olimovning Yevropadagi aktivlari va investisiyalari haqida bilishini aytib, tadbirkorning farzandlari haqida gapirgan va bankirning shaxsiy kotibini ham o‘g‘irlash bilan tahdid qilgan.
Oxir-oqibat Olimovni 5 mln dollarlik qarz haqida tilxat olishga majbur qilishgan. Tadbirkor haydovchisi orqali Toshkentdagi vositachiga 200 ming dollar avans o‘tkazib bergan.
Ozod qilish va tergov
Bu ilk to‘lov o‘g‘irlaganlarga garovdagi shaxsni ozod qilishi uchun yetarli bo‘lgan. Olimovni Nissa vokzaliga olib borishgan, u yerdan poyezdda Parijga ketgan va darhol polisiyaga murojaat qilgan. Fransiya polisiyasi uyushgan guruh tarkibida o‘g‘irlash bo‘yicha ish ochgan va «turk millatiga mansub» bir gumonlanuvchini qo‘lga olgan.
Olimov so‘roqdan so‘ng darhol Toshkentga qaytib, o‘z xavfsizligini ta’minlash uchun qo‘riqchi yollagan. Biroq, nashrning yozishicha, o‘g‘rilikning taxminiy tashkilotchisi unga Telegram orqali tahdid va talablar yuborishda davom etmoqda. Shuningdek, u polisiyaga qilingan murojaatdan hayron bo‘lib, bularning barchasi «hazil» ekanini aytgan.
Qahramonjon Olimov 2020 yilda tashkil etilgan va «milliard dollardan ortiq aktivlarga ega» Anorbank raqamli banki aksiyalarining 99,38 foiziga egalik qiladi, shuningdek, Niderlandiyada ro‘yxatdan o‘tgan kompaniya orqali Surxondaryo viloyatida EDF bilan birgalikda kombinatsiyalangan siklli gaz turbinali elektr stansiyasini qurish loyihasida ishtirok etadi.
Shuningdek, tadbirkor Milliy To‘lov Tizimlari (Hamyon xizmati), Clever Mikromoliya Tashkiloti, Distri For Country (to‘lovlarni yig‘ish agentliklari va kredit byurolari faoliyati), Anor Assets (moliyaviy lizing) va Dynamic Energy (issiqlik elektr stansiyalari tomonidan elektr energiyasi ishlab chiqarish) kompaniyalarida ulushlarga ega. 2023 yilda u O‘zbekistondagi bi1 (Fransiya supermarketlar tarmog‘i) kompaniyasining hammuassisi bo‘lgani haqida xabar berilgandi.
OAVda aksiyador o‘g‘irlangani haqida tarqalgan xabarlardan so‘ng Anorbank hodisa xususiy xarakterga ega ekani va moliya muassasasi faoliyatiga ta’sir ko‘rsatmasligi haqida bayonot berdi. Filiallar va xizmatlar barqaror ishlamoqda, deya ta’kidladi bank.