Илк туйғулар

У-фф…яна кеч қолди…Уйқучи, ухлаб қолгандир-да. Ҳар куни шу аҳвол. Мен бўлсам дарвозанинг олдида кути-и-иб туравераман. Кутишимни билсаям, барибир вақтида келмайди. Жаҳлимни чиқазишга чиқазиб, яна кўзларини мўлтиратиб тураверади. “Кечий, Юстам, бошқа қимийман” деб. Қаёқда? бошқа қимасмиш, ана, яна кеч қолди-ку!

– Ҳа, Рустам, келмайсанми, нима қилиб турибсан, у ерда?

Оббо, боғча опамла… “Нима қилиб турибсан”миш, нима қилардим, дунёдаги энг уйқучи қизни кутяпманда…

– Ҳозир бораман, Шеторани кутвомман.

– Вой, бу жинқарча-эй, миттигина бўлиб қизларни кутади-я…

Боғча опа ичкарига кириб кетади.

Кутмаям кўрайчи? Кун бўйи қовоғи осилиб юради.

И-э ана, келяптилар уйқучихон, ойижонисини қўлидан ушаволи-иб, қўлини силкитишини-чи! Жаҳлим чиққанини билдириб қўймасам, ҳар куни кеч қолаверади. Қани бир тескари ўгирилиб туриб олай-чи, нима қиларкин.

Ана, орқамдан “чий– чий” қилган товуш эшитиляпти. Уни туфлигидан юрганда шунақа товуш эшитилади. Шунинг учун узоқдан туриб ҳам бемалол билиб олса бўлади, у келаётганини…

– Юста-ам!

Ҳиҳ, эркатой…ҳозир ялинишни бошлайди. Ана, етмадимми?

– Юста-ам, кечий, ухлаб қопман…

Мен индамай туравераман. Мен бу ерда кутиб ўтирибману, бу киши маза қилиб ухлаб ётармиш.

– Кечи-ий, бошқа қимиман! Яна бий майта кеч қосам жинниман!

– Ўзи шундоғам жиннисан!

Кулишиничи…ана, топвоган қилиғи шу, жимжилоғини чўзиб тураверади.

– Яяш-яяш қилилик?!

Кўзларини жовдиратиб туришини-чи, эркатой! Барибир йўқ деёлмаслигимни билади-да!

– Бўпти, – дейман қўлимни чўзиб, - фақат бошқа кеч қомийшан!

– Хўп!

– Отимни тўғри эташан!

– Тўғйи этаману…

– Мани отим Юстаммас, Руштам! Тўғри этармиш…

– Ўзинам Шетоя дийсанку!

Ярамас, бунга гапириб бўларканми? Дарров гап қайтаради. Чўнтагимдан боя дадам билан магазиндан олган нарсамни оламан.

– Вууй, нима у?

Ширинликни роса яхши кўришини биламанда.

– Чупа-чупиш!

– Мангами?

– Ҳм…

– Яхмат Юстам!

Яна Юстам дейдия! Дарров очиб оғзига солиб олади.

Эшик очилиб боғча опам чиқиб келади.

– Ҳа, келдими Шеторанг? Қани юринглар энди, шумтакалар!

“Чупа-чупс”ни шўлпиллатиб сўраётган уйқучини қўлидан тортиб, ичкарига олиб кираман.

Эндиям кеч қолиб кўрсин-чи? Эркатой!