Андижон вилоят Қурилиш бош бошқармаси бошлиғи Р.Хожибоевга

Андижон вилояти Қурилиш соҳасида худудий назорат инспекцияси томонидан Андижон шаҳар 2-кичик даха худудида “VELIKIY VELIKAN” МЧЖ томонидан қурилиши амалга оширилаётган 7 қаватли турар-жой биноcида амалга оширилаётган қурилиш-монтаж ишларини юридик ва шаҳарсозлик хужжатларининг мавжудлиги, бажарилаётган қурилиш-монтаж ишларининг амалдаги ГОСТ, ШНҚ, ҚМҚ талабларига хамда лойиха-смета хужатларига монандлиги жойида ўрганиб чиқилганда қуйидагилар маълум бўлди.

Андижон шаҳар хокимининг 2017 йил 11-август кунидаги 787-Қ сонли қарори билан Андижон шаҳар С.Зулунова кўчаси, 4-уйда яшовчи фуқаро Валиев Лазизбек Турдибаевичга 2-қаватли “Тиббий хизмат кўрсатиш шаҳобчаси” биноси қуриш учун Андижон шаҳар 2-кичик даҳа худудидан 450.0 кв.метр ер майдони ажратиб берилган. Белгиланган тартибда архитектура режалаштириш топшириғи (АРТ) хужжати тайёрланган, “Универсал Дизайн ДМ” МЧЖ томонидан лойиҳа хужжати ишланган, лойиҳа хужжати “Шаҳарсозлик хужжатлари экспертизаси” ДУК Андижон филиали томонидан кўрикдан ўтказилиб, 2020/546/1 сонли экспертиза хулосаси берилган. Андижон вилоят Қурилиш соҳасида худудий назорат инспекцияси томонидан 2-қаватли “Тиббий хизмат кўрсатиш шахобчаси” биноси қурилиш объекти учун 07.08.2020 йилда 732-сонли оммавий офёрта расмийлаштирилган.

“VELIKIY VELIKAN” МЧЖ таъсисчиларининг жамият балансига “қурилиши тугалланмаган кўчмас мулкни ўтказиб бериш ҳақида”ги 11.12.2020 йилдаги 1-сонли шартномасига асосан Валиев Лазизбек ўзига тегишли бўлган Андижон шаҳар 2-кичик даҳа худудидаги 450.0 кв.метр ер майдондаги қурилиши тугалланмаган “Тиббий хизмат кўрсатиш шаҳобчаси” биносини “VELIKIY VELIKAN” МЧЖ балансига тасарруф этиш ҳуқуқи билан ўтказиб берган.

Аслида қурилиши тугалланмаган бино 2-қаватли тиббий хизмат кўрсатиш биноси сифатида эмас, балки 7-қаватли турар-жой биноси сифатида қурилиши бошланган бўлиб, турар-жой бино қурилиши учун дастлабки қурилишга рухсат берувчи шаҳарсозлик хужжатлари расмийлаштирилмаган, тасдиқланган ва экспертиза кўригидан ўтказилган лойиҳа хужжати мавжуд эмас, архитектура кенгашидан ўтказилмаган, қурилиш-монтаж ишларини бошлаш учун инспекцияни ҳабардор қилмаган. (Қурилиш тугалланмаган объектнинг кадастр паспорти бўйича 186,07 квюметр қўшимча ер майдон ўзбошимчалик билан эгаллаб олинганлиги келтирилган).

Андижон шаҳар Қурилиш бошқармаси томонидан 2021 йил 11-январь кунида қурилиши тугалланмаган бино иншоотларини 7-қаватдан кам бўлмаган турар-жой биносига мослаб қуриш учун 159-сонли рухсатнома берилган. “VELIKIY VELIKAN” МЧЖ томонидан ушбу қурилиши тугалланмаган 7-қаватли турар-жой биносида юқорида кўрсатилган ўтилган камчиликларга йўл қўйган ҳолда, қурилиш объектига бўйруқ асосида иш юритувчи (прораб) ва техник назорат ишларини доимий олиб борувчи маъсул вакил бириктирилмасдан, қурилиш маълумотига ва етарли малакага эга бўлмаган оддий ишчилар билан қурилиш-монтаж ишлари олиб борилмоқда. Натижада, объектда темир-бетон устун ва диафрагма конструкцияларига арматура каркаслар тўқиш ишлари амалдаги қурилиш-меъёрлари талабларига зид равишда бажарилмоқда.

Шунингдек, бинонинг асосий устуни вазифасини бажарувчи темирбетон диафрагма конструкцияларига диаметри 8.0 мм бўлган силлиқ (гладкий) арматура стерженлари қўлланилмоқда, диафрагма конструкцияларининг ячейкаларининг ўлчамлари меъёр талабларига жавоб бермайди. Конструкцияларга бетон қоришмалари қуйишда вибратордан фойдаланилмаяпти. Қўлланилаётган бетон қоришмаларининг лойиҳавий маркаларини тасдиқловчи лаборатория анализ намуналари ва хулосалари умуман олинмаган. Ғиштли девор конструкцияларининг қуришда ҳар 500.0 мм баландлик бўйича масофада қўйилиши шарт бўлган сим тўрлар умуман қўйилмаган, ғишт қатор ораларининг бир текисда бажарилиши таъминланмаган, объектда КМК3.03.01-98 “Юк кўтарувчи ва тўсувчи конструкциялар” ҚМҚ 2.01.03-19 “Зилзилавий худудларда қурилиш” ва ҚМҚ 3.01.02.00 “Қурилишда ҳавфсизлик техникаси” қурилиш меъёрлари ва қоидаларига риоя этилмаган.

Объектда техник-ижроий журналлар юритилмаган, ёпиқ ишлар далолатномалари, оралиқ конструкцияларнинг қабул қилиш далолатномалари расмийлаштирилмаган. Муаллифлик назорат ишлари олиб борилгани йўқ, муаллифлик назорати журнали мавжуд эмас. Кўринадиган жойга ўрнатилиши лозим бўлган объект қурилишининг паспорти мавжуд эмас, бу билан ШНҚ 3.01.01-03 “Қурилишда ишлаб чиқаришни ташкил қилиш” шаҳарсозлик норма ва қоидаларининг талабларига риоя этилмаган.

“VELIKIY VELIKAN” МЧЖ томонидан ноқонуний равишда қурилиши амалга оширилаётган 7-қаватли турар-жой биноси билан мавжуд 4-қаватли турар-жой биноларининг узун томонлари оралиқ масофаси 19-21.0 метрни ташкил этади. Вахолангки, кўп қаватли турар-жой биноларининг қулай жойлаштиришни энг кичик масофаларини аниқлаш бўйича “Ўзбекистон Республикаси шаҳарларида турар-жой қурилишларини лойиҳалаштиришни тавсиявий” қоидаларига мувофиқ 7 ва 5-қаватли турар-жой биноларининг узун томонлари орасидаги масофа 34.0 метр бўлиши белгилаб қўйилган. Шунингдек, ШНҚ 2.07.01-03* шаҳарсозлик норма ва қоидаларининг 21.1-банди талабларига мувофиқ ёнма-ён жойлашган кўп қаватли турар-жой биноларини яшаш хоналарини яққол кўринмаслик шартларини ҳисобга олиб жойлаштирилиши белгиланган.

Кўрсатиб ўтилган хато ва камчиликларни инобатга олган ҳолда хамда бино жойлашув ўрнини вилоят Қурилиш Бош бошқармаси хузуридаги Архитектура шаҳарсозлик кенгаши томонидан Шаҳарсозлик норма
ва қоидалари асосида қайтадан кўриб чиқилишига хамда “VELIKIY VELIKAN” МЧЖ томонидан қурилиши амалга оширилаётган 7-қаватли турар-жой биноси қурилишини тўхтатилиши лозим бўлади.

Юқоридагилардан келиб чиқиб, Ўзбекистон Республикасининг "Маъмурий тартиб-таомиллар тўғрисида"ги Қонуннинг 59-моддаси, 2-хатбошида “Маъмурий ҳужжатни бекор қилиш ёки ўзгартириш зарурияти қонун ҳужжатларидаги ўзгартишлар, жамоат манфаатларига бўлган таҳдиднинг олдини олиш, маъмурий ҳужжатнинг қонун ҳужжатларига номувофиқлиги аниқланганлиги сабабли юзага келган ҳолларда ва қонунда назарда тутилган бошқа ҳолларда маъмурий орган ўзи қабул қилган маъмурий ҳужжатни ўз ташаббусига кўра бекор қилишга ёки ўзгартиришга ҳақли” деб белгилаб қўйилганлигини инобатга олган ҳолда, Андижон шаҳар Қурилиш бошқармаси томонидан 2021 йил 11-январь кунида қурилиши тугалланмаган бино иншоотларини 7-қаватдан кам бўлмаган турар-жой биносига мослаб қуриш ҳақидаги 159-сонли рухсатномани белгиланган тартибда бекор қилиш чорасини кўришингизни сўрайман.

Каналга уланиш: http://t.me/muxbir1