ЁШ ҚИЗГА ЧУВ ТУШГАН ЖУВОН

 Фирибгарлик жинояти – жамиятни емирувчи иллатлардан бири. Афсуски, кейинги даврда хотин-қизлар томонидан бу турдаги жиноятларни содир этиш ҳолатлари кўплаб учрамоқда.

Қуйида шундай ҳаётий воқеалардан бирига тўхталамиз.

Мафтуна Ўтаева (исм-шарифлар ўзгартирилган) 2018 йил ёз фаслида фириб ови учун Каттақўрғон шаҳридаги “Эски шаҳар” кўчасида жойлашган уяли телефон аппаратларини таъмирлаш устахонаси олдини танлади.

Одатдагидек, Мафтуна ўтган-кетган одамларга тилла тақинчоқлари борлигини, пул керак бўлганлиги сабабли сотаётганини айтарди. Унинг тузоғига Мастура исмли аёл тушди. Унга тилла занжири ва тилла билагузугининг ҳар бир граммини 180.000 сўмдан сотмоқчи эканини маълум қилиб, ушбу қимматбаҳо ашёларни кўрсатди.

Мафтуна Мастурани ушбу тилла тақинчоқларни арзон нархда сотиб олиш­га қизиқтирди. Унинг фириби иш берди.

Мастурага бир томондан, ўзининг тилла тақинчоқларга ўчлиги, иккинчи томондан, қимматли буюмларни ёшгина қиз таклиф этаётгани, учинчи томондан эса нархини арзон айтгани ёқиб тушди. Албатта, у ушбу тақинчоқларни аввал заргарга кўрсатишни унутмади.

Заргар буюмлар ҳақиқатан ҳам тилладан ясалганини тасдиқлади. Натижада Мастуранинг тилла тақинчоқларга нисбатан ҳеч қандай шубҳаси қолмади.

У Мафтуна билан тилла тақинчоқларни 3.564.000 сўмга сотиб олишга савдолашди. Келишилган пулларнинг бир қисмини, яъни 2.600.000 сўмини ҳозир беришини, қолган 964 000 сўмни бир ҳафтадан сўнг етказишини билдирди.

Мафтуна аввалига бироз ўйланиб турди, сўнг рози бўлди. Фақат бир шарт билан, тилла тақинчоқларни қоғоз ва скотч билан ўраб унга қолдириб кетади.

Мастура бунга рози бўлди. Уйидан скотч бўлагини келтиришга кетди. Бу орада Мафтуна тилла тақинчоқларни сариқ металл­дан ишланган сохта занжир ва билагузукка алмаштириб қўйишга улгурган эди.

Мафтуна пулларни олди-ю, тақинчоқларга пулини тўлиқ бергунига қадар тегмаслигини Мастурага қаттиқ тайинлаб, жуфтакни ростлади.

Эртаси куни Мастуранинг қизиқиши устун келиб, ўроғлиқ тақинчоқларни очиб кўрди-ю ҳушидан айрилди... Дарҳол ички ишлар бўлимига югурди.

Мафтуна судда барча қилмишини тан олди, зарарни қоплади. Суд унга тегишли жазо тайинлади.

Абдусаттор АбдураззоҚов,

Жиноят ишлари бўйича

Каттақўрғон шаҳар судининг раиси