Шўртан газ кимё мажмуасида "ШГКМ Ёшлари: ҳаракатдан - тараққиёт сари" номли устоз-шогирд ва раҳбарлар форуми бўлиб ўтди
Жорий йилнинг 4-7 июль кунлари Қашқадарё вилояти Шаҳрисабз туманининг Мироқи шаҳарчасида жойлашган “Лочин” болалар соғломлаштириш оромгоҳида "Шўртан газ кимё мажмуаси" МЧЖда фаолият олиб бораётган малакали ёш мутахассислар ва раҳбар ходимлар иштирокида “Янги Ўзбекистонни биргаликда қурамиз” шиори остида "ШГКМ Ёшлари: ҳаракатдан - тараққиёт сари" номли устоз-шогирд ва раҳбарлар форуми ўтказилди.
Мазкур форум мажмуада меҳнат қилиб келаётган ёш мутахассисларни ҳар томонлама қўллаб-қувватлаш, уларнинг касбий ва шахсий камолотини таъминлаш учун зарур шарт-шароитлар яратиш ҳамда мажмуада кадрлар захирасини шакллантириш тизимини янада такомиллаштириш ва ривожлантириш мақсадида ташкил этилди.
Форумнинг дастлабки куни тантанавор очилиш маросими билан бошланди ва гуруҳларга бўлинган жамоаларнинг қисқа вақт ичида тайёрлаган қизиқарли тақдимотлари билан давом этди.
Шундан сўнг, форум дастурига мувофиқ спортнинг футбол, волейбол, шахмат-шашка, стол тенниси, сув полоси, қувноқ мерганлик ва киберспорт турлари бўйича мусобақаларга старт берилди.
Форумнинг иккинчи куни қизиқарли тимбилдинглар билан бошланиб, спорт мусобақаларининг плей-офф босқичлари билан давом этди.
Шунингдек, куннинг иккинчи ярмида иштирокчиларни илм олишга, китоб ўқишга, изланишга бўлган қизиқишларини қўллаб-қувватлаш мақсадида "Zakovat Quiz" интеллектуал ўйини ташкил этилди.
Форумнинг учинчи куни барча мусобақалар ва турнирларнинг финал қисми ўтказилди. Ташкил этилган футбол, волейбол, шахмат-шашка, стол тенниси, сув полоси, қувноқ мерганлик ва киберспорт каби мусобақаларда иштирокчилар ўзларининг жисмоний ва интеллектуал салоҳиятини намойиш этишди.
Куннинг охирида, ош чемпионати ўтказилди. Бу чемпионатда раҳбарлар ва улурнинг шогирдлари ўзларининг ош тайёрлашдаги маҳоратларини намойиш этишди.
Форум жонли ижродаги куй-қўшиқлар ва бадиий чиқишларга бой бўлиб, иштирокчиларга катта завқ ва илҳом бағишлади. Тадбир иштирокчиларига янги билимлар ва малака ошириш имконияти берилди, шунингдек, уларнинг ўзаро ҳамкорлик ва алоқаларини янада мустаҳкамлаш учун имконият яратилди.
Форумнинг ёпилиш маросимида ўтказилган барча спорт мусобақалари ва беллашувларда ғолиб бўлган иштирокчиларга мажмуа маъмурияти ва Касаба уюшма қўмитаси томонидан дипломлар ва эсдалик совғалари топширилди.
