"Брейн-ринг" интеллектуал шоусининг 2024 йилги мавсуми ғолиблари аниқланди
"Шўртан газ кимё мажмуаси" МЧЖ фаоллар залида "Брейн-ринг" интеллектуал шоусининг 2024 йилги мавсуми финал босқичи беллашуви бўлиб ўтди.
Финал баҳсида, барча саралаш босқичларидан муваффақиятли ўтиб келган қуйидаги жамоалар: Умумий овқатланиш цехининг- "OSHPAZLAR", Саноат хавфсизлиги, соғлиқни сақлаш, меҳнат ва атроф муҳит муҳофазаси бошқармасининг "ABSOLYUT", Кўкаламзорлаштириш тармоғининг – "KO'KALAM", Завод марказий лабораториясининг - "KIMYOGAR" жамоалари ўзаро беллашдилар.
Қизғин баҳс ва ҳақиқий интригага бой бўлган финал беллашуви натижаларига кўра: Кўкаламзорлаштириш тармоғининг – "KO'KALAM" жамоаси 2 балл билан тўртинчи ўринни, очколар тенг келиб қолгани ҳисобига берилган қўшимча саволлар натижасида Умумий овқатланиш цехининг- "OSHPAZLAR" жамоаси 2,5 балл билан учинчи ўринни, Саноат хавфсизлиги, соғлиқни сақлаш, меҳнат ва атроф муҳит муҳофазаси бошқармасининг "ABSOLYUT" жамоаси ўйиннинг асосий вақтида тўпланган 3 балл билан иккинчи ўрини эгаллашди. Завод марказий лабораториясининг - "KIMYOGAR" жамоаси эса ўзларининг мавсум давомидаги энг ёрқин ўйинларини кўрсатгани ҳолда, 4 балл билан "Брейн-ринг" мусобақасининг 2024 йилги мавсуми чемпиони бўлишди.
"БРЕЙН РИНГ" интеллектуал шоусининг "Финал" беллашуви натижалари:
Мазкур интеллектуал беллашув финалида ҳам томошабинлар билан "ўйин ичида ўйин" ўтказилиб, бошловчи томонидан берилган интеллектуал саволларга аниқ ва тўғри жавоб берган фаол иштирокчиларга "Шўртан газ кимё мажмуаси" МЧЖ маъмурияти ҳамда Касаба уюшма қўмитаси томонидан эсдалик совғалари топширилди.
Шунингдек, ҳайъат аъзолари хулосасига кўра, Кўкаламзорлаштириш тармоғи ходими Санаев Жалолиддин финал беллашувининг энг яхши ўйинчиси деб топилди ва Шўртан газ кимё мажмуасининг махсус эсдалик совғаси билан тақдирланди.
Тадбир сўнгида мажмуа Бош директори Ш.Асланов сўз олиб, ушбу интеллектуал ўйин ҳақида илиқ фикрлар билдириб ўтди ва мажмуа раҳбарияти томонидан ғолиб жамоалар муносиб тарзда тақдирландилар.
"БРЕЙН РИНГ" интеллектуал шоуси финал баҳсидан фотолавҳалар:
