Мажмуа хотин-қизларига сертификатлар топширилди
Ўзбекистон Республикаси Президентининг 07.03.2024 йилдаги "Хотин-қизларнинг тадбиркорлигини йўлга қўйиш ва ривожлантиришни қўллаб-қувватлашга оид қўшимча чора-тадбирлар тўғрисида"ги ПҚ-122-сонли қарори ижросини таъминлаш ҳамда 2024-йил - "Ёшлар ва бизнесни қўллаб-қувватлаш йили”да тадбиркорлик ва кичик бизнес билан шуғулланиш истагида бўлган ҳунарманд аёлларни қўллаб қувватлаш мақсадида "Ўзбекнефтгаз" АЖ Хотин-қизлар масалалари бўйича жамоатчилик кенгаши ҳамда Қашқадарё вилоят Оила ва хотин-қизлар бошқармаси ташаббуси билан 2024 йил 14 ноябрь куни "Тадбиркор аёл" Халқаро ишбилармон аёллар ассоциацияси Қашқадарё вилоят бўлимида "Бизнес асослари" мавзусида ўқув семинари ташкил этилди.
Семинарда, Қашқадарё вилоят Оила ва хотин-қизлар бошқармаси масъуллари, "Тадбиркор аёл" Халқаро ишбилармон аёллар ассоциацияси Қашқадарё вилоят бўлими вакиллари, вилоятимиздаги тажрибали тадбиркорлар, ҳунармандчилик соҳаси дарғалари, таълим муассасалари ҳамда йирик корхона ва ташкилотлардаги ҳаваскор ҳунарманд аёллар иштирок этишди.
Даставвал, семинарга жалб қилинган малакали соҳа мутахассислари ва тажрибали тадбиркорлар томонидан иштирокчиларга ўз фаолиятини ривожлантириш ва тадбиркорлик фаолиятини йўлга қўйиш борасидаги зарур бўлган билим ва кўникмалар улашилди.
Ушбу семинарда Шўртан газ кимё мажмуаси хотин-қизлар бошланғич ташкилоти томонидан мажмуада ташкил этилган “Ҳунарманд аёллар уюшмаси”нинг 14 нафар аъзоси ҳам иштирок этишди.
Семинар якунида барча иштирокчиларга, жумладан Шўртан газ кимё мажмуадаги “Ҳунарманд аёллар уюшмаси”нинг 14 нафар вакилига ҳам "Тадбиркор аёл" Халқаро ишбилармон аёллар ассоциацияси Қашқадарё вилоят бўлимининг аъзолик гувоҳномаси ҳамда сертификатлари топширилди.
Маълумот учун, мажмуада хотин-қизларнинг бўш вақтларини мазмунли ташкил этиш, уларни ҳар томонлама қўллаб-қувватлаш мақсадида ҳар йили ўтказиладиган Наврўз умумхалқ байрам дастурида ҳамда хотин-қизлар форумида ҳунармандчилик кўргазмалари ташкил этилади ва ҳунарманд аёлларимизнинг энг сара ижод намуналари мажмуа тарихи музейига жойлаб борилади.
